DPL ta buscando hende pa traha urgente pa un proyecto den e sector di construccion.

Departamento di Progreso Laboral (DPL) den cuadro di su meta y enfoke principal pa yuda esnan local haya un trabao ta informa cu ta buscando hende pa traha urgentemente den e sector di construccion. Pa un proyecto temporal DPL ta buscando hende pa yena e vacatura nan di painter, tegelzetter, drywall finisher y tapijtlegger.

Bo persona ta apto y dispuesto pa traha un periodo den un di e vacatura nan menciona? Bo tin experencia caba haciendo e trabao nan aki? Pasa libremente na DPL Seroe Blanco p’asina yena un formulario di registracion cu ta disponibel na balie of por pasa tambe na oficina di Gobierno den edificio Edison Briesen na San Nicolas (pabao di YMCA).

Ultimo dia pa registra pa e vacatura nan aki lo ta dia 5 di juli 2019. DPL lo percura pa haci un pre-screening pa asina sondea e mihor candidato nan, esnan cu ta cumpli cu e rekisitonan y finalmente recomenda e grupo aki na e dunador di trabao concerni. Ta recomenda tur esnan cu tin experencia di trabao di construccion y/of ta interesa pa bay traha den sector aki pa pasa registra na DPL. Si acaso no a selecta bo pa e proyecto aki, bo nomber lo keda registra na DPL y asina cu drenta otro vacatura nan di construccion y bo persona ta cumpli cu e rekesito nan stipula DPL por yama bo.

DPL ta haci uzo di e asina yama “matching” caminda cu ora vacatura nan drenta ta bay sondea den e sistema di registracion (databank) pa posibel candidato nan cu ta apto y dispuesto pa yena e vacatura (nan). Pa e motibo aki ta importante pabo ta registra na DPL ora cu ta buscando un trabao.

Ta anticipa cu den futuro cercano lo bay tin mester di mas hendenan pa traha den e sector di construccion mirando tur e desaroyonan cu tin andando pa locual ta trata construccion di edificio y infrastructura nan nobo na Aruba.