Dolfijn y bayena ta especienan protegi pa leynan local, mester laga nan na paz

ORANJESTAD- Directie Natuur en Milieu (DNM) a tuma nota cu recientemente tin hendenan y hasta companianan ta stroba  dolfijnnan den nos awanan teritorial.

Aruba su awa tin masha hopi actividad di dolfijn y bayena durante henter aña. Mester ta alerta ora topa e especienan aki den nos awanan. E motibo pa cual nan ta cerca di nos costanan no ta pa entretene hende, pero pa algun motibo di necesidad. En bes cu hende scoge pa molestia e bestianan, DNM ta haci e peticion pa aleha di e sitio y laga nan na paz.

Den nos awa teritiorial tin 6 especie di dolfijn cu tin luga di refugio cerca di nos costa. E sortonan ta:

Tursiops truncatus, Steno bredanensis, Stenella longirostris, Stenella frontalisStenella attenuata, y Stenella coeruleoalba

Aruba ta un kraamkamer (luga unda nan ta nace) di e 6 especienan aki y e nursery ta situa 3 kilometer rond di costa. E especienan cu ta yega cerca mester di proteccion, ora ta duna luz of recupera di nan heridanan.

Nan ta bin pa sconde tambe di nan predatornan, manera tribon.

DolfijnDNM kier a enfatisa y ta recorda tur hende cu tur dolfijn y bayena ta proteha pa nos leynan local. Articulo 7 inciso 3 di Natuurbeschermingsverordening ta specifica cu ta prohibi pa stroba e especenan protegi aki. E actonan aki ta castigabel pa ley(strafbaar). Den ley tin para: “Het is verboden een in het wild le­vend dier als bedoeld in het eerste lid, te van­gen of opzettelijk in zijn rust te ver­sto­ren”.

DNM ta pidi pa coopera cu proteccion di nos fauna na Aruba, pa asina yuda cu conservacion di nos recursonan natural.

DolfijnManere menciona, e specienan aki di dolfijn y bayenanan ta bini mas tanto pa busca refugio cerca di nos costa; ora nan ta den necesidad di proteccion, pa haya y cuida nan yiunan, como tambe pa recupera ora nan ta malo. Pues hende cu encontra e dolfijnnan no mag di stroba nan, bay cerca di nan, duna nan cuminda, saca potret of filma nan. Semper ta mihor pa observa e dolfijnnan for di un distancia respetabel cu ta sigur pa nan y abo mes. No publica riba media unda a wak nan y/of unda por localisa nan. Mundialmente e norma ta cu ora ta observa e mamiferonan marino, pa no landa, no core riba, no mishi, no purba interactua cu e especienan aki. Keda na un distancia di 50 meter si ta riba lama grandi ora nan ta djis hungando y bulando den e olanan. Pero ta recomenda pa keda 100 meter leu ora cu nan ta cerca nos costa. Mayoría biaha nan ta den un grupo mas grandi pa yuda cu proteccion.

DNM y Kustwacht ta traha di cerca cu Aruba Mammal Foundation cu ta e NGO encarga pa proteccion y investigacion di e especienan mamífero.  

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options