DNM ta duna informacion riba e mata protehi Cuco di indjan (Agave arubensis)

E Agave arubensis, a hay’e na un sitio so na Aruba. A yega di hay’e riba calichi pazuid di Fontein, cerca di e drumidera y e ta crece unicamente na Aruba, p’esey tambe su nomber. E ta endemico na Aruba y probablemente no ta hay’e mas. E sortonan di agave endemico su existencia ta menasa door di construccion di cas y bendemendo di mata pa landscaping. E ta un mata endemico cu ta crece den forma di un rozet. E blachinan ta suculento, dus ta manera vettig y ta lombra y su puntanan ta hinca (stekels). E ta floria geel.

E decreto nacional (AB 2017 no. 48) a drenta na vigor na augustus 2017 y ta brinda proteccion na un cantidad di 69 bestia y 55 mata. Despues cu un comision a revisa e Natuurbeschermingsverordening di 1995 (AB 1995 no. 2), e lista a conoce un ampliacion di e especienan cu ta protegi internacionalmente bou di CITES y SPAW, cu ta protocolnan estableci mundialmente.

DNM ta elabora y enfoca riba e sortonan cu ta aparece den ley y asina ta yuda conscientisa  pueblo riba e matanan y bestianan cu ta protegi. E decreto nacional Proteccion Flora y Fauna Articulo 1 ta ilustra e especienan den detaye cu e nomber scientifico y e nomber local. Den articulo 1 ta aparece esnan cu ta bou di menasa di extincion mundialmente. Articulo 5 y 6 di e Natuurbeschermingsverordening ta indica mata y bestiariba e lista aki cu ta prohibi pa exporta. Ta prohibi pa kap, corta of haci daño na e matanan protehi. Ademas den articulo 19 ta fiha castigo (strafbepalingen) di entre castigo di prison di maximo dos aña, como tambe boetcu por yega te cu suma di 100.000,00 florin.

Fuente di e informacion aki ta:

• Buki De inheemse bomen van de Benedenwindse eilanden di J.A de Freitas (1996);
• Arnolodo’s Zakflora di A.S.J van Proosdij (2012)
• Literatuur Aandachtsoorten binnen de Arubaanse Flora di A.H van Schaik y L.M Petrocchi (feb 1998).

Potret ta cortesía di Sra Olinda Rasmijn di Stimaruba (AUA) y Sr John A. de Freitas (CUR)