Diferente turistanan tratando di bandona Aruba cu cocolishi, santo blanco of coral

ORANJESTAD - Den e ultimo lunanan cu a pasa, departamento di douane na aeropuerto a intercepta diferente turista cu na momento di regresa nan pais, kier hiba cu nan cocolishi, santo blanco y coral for di nos naturalesa.

Cocolishi, coral y santo blanco.Conforme e tratado international di CITES y nos leynan local manera e Decreto nacional proteccion flora y fauna local (Landsbesluit bescherming inheemse flora & fauna) y e Ordenansa di santo (Zandverordening), ta prohibi pa saca y exporta cocolishi, coral y santo blanco for di Aruba pa proteha nos medio ambiente.

E cantidad di cocolishi, coral y santo blanco confisca ta hopi straño y ta suspecha cu hende local of residente lo por ta ofreciendo esakinan na benta cu e turistanan locual ta prohibi.

Ora e turistanan yega aeropuerto nan ta wordo confronta cu un boet y e material ta wordo confica. Esaki sigur no ta un experiencia agradabel pa e turista na momento cu e ta bandona nos isla. Esaki por conduci na reaccionan negativo cu ta pone Aruba su sector turistico den un luz negativo

Ban hunto duna nos naturalesa e respet cu e merece pa asina proteha nos medio ambiente, stop di colecta cocolishi, santo blanco of coral for di nos naturalesa y stop di ofrece turista esakinan. Nos tur kier pa nos futuro generacion y turistanan por gosa di nos beachnan, cocolishi y coral? Ban hunto proteha nos naturalesa.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options