Dienst Ouderenzorg ta informa pueblo riba maneho y protocolnan vigente en conexion cu COVID-19

ORANJESTAD - Recientemente Dienst Ouderenzorg a manda carta pa tur gerente di casnan di cuido pa reinforsa e protocolnan di COVID-19 y higiena.

Tambe a haci peticion na gerente pa yuda regla e vacunacion contra COVID-19 pa tur nan habitantenan y trahadornan cu ainda no ta vacuna. Como seccion encarga cu cuido di nos grandinan, nos kier encurasha famianan di persona cu dementia pa porfabor laga vacuna nan grandinan.

Cas di cuido adulto mayorComunidad por a tuma nota cu e biaha aki ora cu casonan a subi, Directie Volksgezondheid no a impone ciere ariba casnan di cuido. Esaki pasobra nos di Dienst Ouderenzorg tin pleno confiansa den e protocolnan vigente y tambe den e vacuna. Actualmente mas cu 80% di habitantenan den casnan di cuido y como tambe trahadornan ta vacuna. Esaki sigur ta positivo y asina ta reduci e riesgo di morto. Aun asina ta pidi cada gerente di cas di cuido pa no laga trahadornan bin traha malo cu sintoma pero laga nan haci test prome cu nan presenta na pia di trabou.

Un bes mas Dienst Ouderenzorg ta urgi tur cas di cuido pa mantene nan mes na un forma estricto na protocolnan, maneho di bishita, higiena y maneho di COVID-19.

Si tin cualkier pregunta tocante protocol y manehonan vigente en conexion cu COVID-19 na casnan di cuido por tuma contacto cu nos libremente na 5224345 of manda nos un email na ouderenzorg@dvg.aw

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options