Dialuna 15 di februari 2021, despues di parada grandi di carnival ta un dia festivo

ORANJESTAD - Ministerio di Asuntonan Social y Labor y Departamento di Labor y Investigacion ta informa cu dialuna 15 di februari 2021, despues di parada grandi di carnaval, ta y ta keda reconoci como un dia festivo.

Aruba a keda gravemente afecta debi na e consecuencianan di e pandemia causa door di e virus COVID-19 (“coronavirus”). Mester a introduci hopi medida di prevencion y precaucion pa purba mitiga e contagio di e virus aki, cu consecuencia serio pa cu nos libertad di movimiento.

Un di e medidanan den cuadro di esaki ta evita aglomeracion di hende. E medida aki a trece gran consecuencia pa nos eventonan cultural, caminda mester a ahusta algun y mester a cancela otro nan temporalmente, tur pa evita mas brote of contagio di e coronavirus riba nos isla.

Un di e eventonan aki cu a cancela temporalmente ta nos dushi carnaval. Durante mas di 65 aña di existencia di Aruba su carnaval, ta prome biaha cu nos ta encontra nos mes cu un situacion asina delicado, cu ta e presencia di un virus asina contagioso, cu ta haci cu e celebracion aki, cu ta ancra den Aruba su cultura, no por tuma lugar.

Sinembargo, nos ta consciente cu si no tawata pa e virus, Aruba su carnaval lo a tuma lugar en grande, manera ta custumber. Tambe ta asina cu, apenas cu e situacion mundial permiti esaki y cu nos por bisa cu e situacion relaciona cu e virus a “normalisa” cu lo reanuda cu tur nos actividadnan cultural manera antes, sin excepcion.

Pa e motibo aki e dialuna despues di parada grandi di carnaval, cu e aña aki ta cay riba 15 di februari 2021, ta y ta keda wordo reconoci como un dia festivo

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options