Dia mundial pa combati secura y suelonan degrada (formación di desierto)

ORANJESTAD - Asamblea general di Nacionnan Uni (UN) a declara oficialmente cu dia 17 di juni ta Dia Mundial pa Combati Secura y Suelonan Degrada (World Day to Combat Desertification and Drought).

E obhetivo di e dia aki ta pa eleva conscientisacion di e retonan asocia cu secura. E solucion ta den e man di comunidad y cu participacion activo y cooperacion na diferente nivel nos ta atende cu e reto aki. Directie Natuur en Milieu (DNM) ta colabora cu e parti di conscientisacion riba e tema. No ta importa ki parti mundo bo ta biba, paso e consecuencia di secura y suelonan degrada  ta concerni nos tur. Globalmente 23% di suelo no ta productivo mas. 75% di e suelonan (teranan) na mundo a cambia di nan estado natural pa mas tanto uzo di agricultura. Aki na Aruba nos clima ta seco y tin scarcedad di awa. Nos mester cuida nos suelo pa e ta den bon condicion y no kita matanan of piedranan cu ta yuda combati erosion.

Convencion di  Nacionnan Uni pa combati formacion di desierto.Suelo degrada ta consecuencia di rosamento, erosion acelera, cambio di clima cu ta resulta den perdida di biodiversidad. Esaki ta consecuencia di actividadnan humano caminda e suelo tin necesidad di restauracion pa yuda combati cambio di clima y brinda servicionan pa yuda e biodiversidad y humanidad ainda mas. Un maneho mas sostenibel di e suelonan ta necesario pa contra aresta suelo degrada. Un decada di suelonan degrada por trece dañonan irreversibel, pero un decada di suelonan restaura tambe ta trece un cantidad di beneficio na bienestar di hende, naturalesa y medio ambiente.

E obhetivo di conscientisacion pa e dia aki den 2022 ta pa demostra cu hunto nos lo por sali di e problematica di suelonan degrada pa por tin suelonan saludabel. Cu conscientisacion ta yuda crea mas accion pa proteha y restaura e areanan natural, asina tambe yuda cu e avancenan pa alcansa e 17 metanan di desaroyo sostenibel di UN (SDG’s).

Unda nos ta awo?

Na Aruba, tin limitacion na espacio pa tereno destina pa cas of otro practica manera esun di plantamento. E practica di rosa tereno completo ta uno anticua y tin impavto negativo riba e suelo y medio ambiente. Kitando matanan y e capa di suelo of cobamento ta acelera e proceso di erosion cu ta degrada e suelo ainda mas. Por pensa riba esnan cu ta kita mata (corta) y saca piedra cu ta wanta e sedimento di teranan den areanan natural, sin cu tin permiso of autoridad. Esaki no ta permisibel, tampoco e ta di aplaudi. Si bo ta stima naturalesa y tambe bo pais y ta desea di wak bo generacion disfruta di locual abo tin awor, lo bo no haci practicanan cu ta destrosa naturalesa.

Dia mundial pa combati secura y suelonan degrada (formación di desierto)Kico ta e solución?

Como individuo bo por combati suelonan degrada door di:

  • Yuda cu e conscientisacion di e tema;
  • comparti informacion cu otronan;
  • cambia bo habitonan y comparti bo accionnan;
  • planea con pa conserva awa y introduci un mihor maneho pa uzo di awa;
  • introduci un sistema di agricultura cu ta abou den consumo di awa necesario pa e matanan crece y produci;
  • planta mas matanan local den bo cura;
  • busca informacion di expertonan;
  • yuda un organisacion pa sembra y planta;
  • siña practicanan mas innovativo di agricultura y siña biba den harmonia cu naturalesa;
  • recicla y re-uza awa, iriga eficientemente y reduci evaporacion di awa;
  • opta pa un dieta varia;
  • inverti den proyectonan cu ta promove rainwaterharvesting y /of solar-powered water pumps.

DNM ta desea cu comunidad Arubano ta mas consciente cu e uzo di awa y con ta anda cu e suelonan y re-establece nan relacion y amor pa naturalesa. E yamada na comunidad global ta pa hunto nos lo por sali di e problematica di suelonan degrada y secura.

Pa mas informacion por bishita e campaña creativo cu meta di entretenimento, promovi pa United Nations Convention to Combat Desertification (UNCCD), cu tin disponibel riba e plataforma www.droughtland.com.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options