Dia Mundial di Parha Migratorio 2023

Dia Mundial di Parha Migratorio ta observa 2 bes pa aña, dia 13 di mei y 14 di october.

E tema principal pa e aña aki ta "awa", mirando e distancia grandi cu e parhanan tin cu bula den nan periodo di migracion. E calidad y cantidad di awa na alcanse di e parhanan ta bao menasa na diferente parti di mundo. P’esey varios organisacion mundial a uni y crea campaña strategico pa crea conscientisacion pa e dia Mundial pa Parhanan Migratorio.

E union aki mester resulta den aumenta conscientisacion pa parha migratorio y nan necesidad, pero ta spera riba mas cooperacion internacional na bienestar di no solamente e parhanan pero tambe nan habitat.

Directie Natuur en Milieu (DNM) ta reconoce e importancia di nos bahianan y saliñanan pa e parhanan migratorio cu mester descansa, come y broei. E condicion mester keda faborabel na e sitionan cu ta fuente di bida pa parhanan. Parha migratorio ta depende di diferente fuente di awa manera, lama, lagun, rooi, dam y bahia. E sitionan aki tin mata cu ta brinda lugar pa alimenta, broei y sconde. Ademas e areanan aki ta importante pa nan descansa pa haya forsa despues di nan biahe largo.

Lamentablemente e habitat y ecosistema acuatico pa parha migratorio ta bao menasa debi na factornan humano. Na Aruba tambe nos por mira e factornan cu a bira reto local, manera scarcedad di awa debi na temporada di secura y demanda halto pa espacio pa vivienda. E habitat principal pa e parha migratorio na Aruba ta Bubali Plas unda ta mira un cantidad di parha tur dia.

DNM ta haci apelacion na comunidad pa eherce cautela ora ta trata cu parhanan salvahe local y migratorio. Aruba tin e ley "Landbesluit beschermde flora en fauna" na unda por haya sa mas di e parhanan protegi na Aruba.