Dia Mundial di Obesidad

E causanan pa desaroyo di e enfermedad di obesidad ta basta compleho y ta encera diferente factor. E ta causa pa un variedad di factor, incluyendo biologia,  salud mental, riesgo genetico, medio ambiente, cuido medico y acceso na cuminda hopi procesa. En fin, obesidad no ta desaroya pa falta di esfuerso so.

Ta bon pa obtene mas informacion tocante e raiz di obesidad. Algun factor adicional cu ta conduci na obesidad aparte di nutricion tambe ta:

• Bida sedentario: no haci movecion y sinta hopi.
• Drumimento: Falta di soño por stroba e trabou di cierto hormona cu por afecta bo peso, mescos cu un nivel halto di stress.
• Riesgo genetico: ta contribui cu 40 pa 70% di nos chens pa haya obesidad.
• Acceso na cuido/tratamento: Sin acceso na profesional y cuido adecua, mayoria di persona cu ta sufri di obesidad no lo yega na un peso saludabel y su mantencion na largo plazo.
• Marketing: Ta comproba cu propaganda/marketing pa cuminda tin un link cu obesidad.
• Salud mental: Sintomanan di algun malesa mental y nan remedi/medicina por causa aumento di peso.
• Stigma: Discriminacion di peso y stigma por tin consecuencia significativo pa un persona cu obesidad.

No duda den pidi ayudo, pa logra un impacto real pa cu obesidad, nos mester traha hunto pa maneha e diferente causanan den nos sociedad y no simplifica e enfermedad, ya cu esaki ta haci e tratamento hopi mas dificil.

Pa mas informacion acudi na bo dokter di cas, POHers, DVG, of IBiSA of bishita Healthy Lifestyle Center Aruba situa na IBISA.

Por contacta DVG:

• Like  Facebook page Directie Volksgezondheid DVG Aruba;
• Follow Instagram directie_volksgezondheid_aruba;
• Subi website www.dvg.aw;
• Yama na 280-0101/522-4200;
• Mail  na servicio@dvg.aw.