Na 1991 Federacion Internacional di Diabetes conhuntamente cu WHO a crea Dia Mundial di Diabetes cu e meta pa hisa conscientisacion den comunidad di e menasa pa salud cu e malesa di diabetes ta trece cu ne.
E meta principal di Dia Mundial di Diabetes ta pa conscientisa y educa comunidad riba e impacto cu diabetes tin riba famia y pa promove e rol di famia den maneho, cuido y prevencion di e condicion. E tema di e dia Mundial di e aña aki ta Famia y Diabetes. Unda lo enfoca riba 3 aspecto.
- Descubri diabetes
- Preveni diabetes tipo 2
- Maneha diabetes
Riba e website di International Diabetes Federation por haya mas informacion riba e tres aspectonan aki:
- Descubri diabetes - https://worlddiabetesday.org/about/discover-diabetes/
- Preveni diabetes tipo 2 - https://worlddiabetesday.org/about/prevent-type-2-diabetes/
- Maneha diabetes - https://worlddiabetesday.org/about/manage-diabetes/
Na Aruba un total di 8.642 persona a haya tratamento pa e malesa di diabetes den aña 2018. Esaki ta costa nos comunidad casi 5 miyon florin pa aña. Plataforma Promotion di Salud ta urgi famianan ta siña mas tocante e señalnan di alerta cu Diabetes ta duna. Y busca pa sa si abo of bo familiar ta na risico di desaroya Diabetes tipo 2 of porta ta bibando caba pa tempo largo cu Diabetes tipo 1 sin cu nan sa di esaki. Door di no trata of maneha diabetes e malesa por conduci na consecuencia serio di salud pa bida largo, manera:
- Cieguedad;
- amputacion;
- problema di riñon;
- ataca di curason;
- atake celebral (stroke).
P’esey durante e luna di november ta urgi tur persona pa laga test nan sucu y pa haci esaki lo bay tin diferente actividad planea durante luna di november. Por tuma nota di tur e actividadnan aki riba e Facebook page di IBISA. Tambe lo bay tin un link ”sa bo riesgo.com” unda comunidad por subi y test nan mes y sa nan riesgo pa desaroya diabetes tipo 2.
Share this page