Dia internacional di nos grandinan

ORANJESTAD – Nacionnan Uni a designa 1 di october como dia internacional di nos grandinan. E aña aki ta marca e di 75 aniversario di Nacionnan Uni y e di 30 aniversario di e Dia Internacional pa nos Grandinan.

Departamento di Salud Publico, Seccion Cuido di nos Grandinan (Dienst Ouderenzorg) kier a gradici tur e enfermeranan cu tin desde maart 2020 trahando duro pa duna cuido y proteccion na nos grandinan.

E aña aki tambe ta un aña cu ta experencia e pandemia di COVID-19, cu mundialmente a causa un intrankilidad grandi. Considerando e risico halto cu nos Grandinan ta confronta cu ne durante e brote di COVID-19, e manehonan y progamanan pa intervencion mester ta dirigi na crea conscientisacion di nan necesidadnan special.  

Dia Internacional pa nos Grandinan 2020 ta subraya e rol di esnan cu ta traha den salubridad pa nan contribucion na cuido y salud di nos grandinan, cu un reconocimento special na e trabao di enfermeria.  E aña aki tambe a wordo reconoci como e “Aña di Enfermera y Partera” y un atencion primordial riba e rol di hende muher cu hopi biaha no ta aprecia y tampoco ta wordo recompensa adecuadamente.

Dia internacional di nos grandinan

E observacion di 2020 lo promove e Decada di Envehecimento Saludabel (2020-2030) tambe, y lo yuda trece e expertonan di Nacionnan Uni (UN), comunidad, gobierno y e profesionalnan den area di salud pa discuti e cinco obhetivonan strategico di e Strategia Global, como tambe e plan di accion riba Envehecimento y Salud. E strategia global ta bon integra den e Desaroyo di e Metanan Sostenibel (Sustainable Developmental Goals (SDG’s)), y tema di envehecimento ta inclui den di 17 metanan, especialmente e meta nr. 3 cu ta enfoca pa “sigura bida saludabel y promove bienestar di tur edad”.

Manera a Dr. Tedros Adhano Ghebreyes (Director General di WHO) a indica:“Actuando riba e strategia, ta un medio pa paisnan por implementa e Agenda pa Desaroyo Sostenibel pa 2030 y pa segura cu cada humano no importa e edad tin e oportunidad pa realisa nan potencial completo cu dignidad y igualdad”.

E tema di 2020 tin e proposito pa:

  • Informa participantenan tocante obhetivonan strategico pa e Decada di Envehecimento Saludabel
  • Crea concientisacion riba e necesidadnan di salud special di nos grandinan y nan contruibucionan pa cu nan mesun salud y e funcionamento di e sociedad den unda nan ta biba aden.
  • Crea conscientisacion y aprecia tur esnan cu ta traha den area di cuido y salud, manteniendo y mehorando e salud di nos grandinan, cu atencion special na e profesion di enfermeria
  • Presenta proposicionan pa reduci e diferencia entre nos grandinan “No laga niun hende atras”
  • Aumenta e conocimiento di e impacto di COVID-19 riba nos grandinan y riba e manehonan di cuido y salud, planificacion y actitud.

Departamento di Salud Publico, Seccion Cuido di nos Grandinan (Dienst Ouderenzorg) ta duna danki na e enfermeranan cu ta cuida y proteha nos grandinan. Tambe nos kier a gradici tur Nos Grandinan pa nan aporte y sosten pa nos dushi Aruba. Ban keda traha uni pa por combati y surpasa e temponan dificil cu e enfoke riba e bienestar di Nos Grandinan. Pabien cu boso Dia ta bay pa tur Nos Grandinan, pa tur e Casnan di Cuido y Centronan di Actividadnan cu ta duna servicio na Nos Grandinan.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options