Dia Internacional di Mangel (Mangroves)- Zwartmangel of Mangel Preto (Avicennia germinans)

Den cuadro di e dia importante aki, Departamento di Naturalesa y Medio Ambiente kier subraya e importancia nos sorto di mangel. E turmo ta na e mangel Tam.

E Zwartmangel of Mangel Preto ta haya su nomber posiblemente door cu for di su troncon e ta saca un colorante preto. 

Por haya e Mangel Preto entre otro na Spaans Lagoen, Mangel Halto y Santo Largo na Savaneta den un habitat cu hopi salo y ta un di e poco especie di mangel cu tin un tolerancia halto pa cambio di temperatura.

Apesar cu su habitat ta uno di hopi lodo, yen di material organico, y falta di oxigeno, e mangel aki a adapta su mes na e ambiente. Por reconoce Zwartmangel na e snorkelnan (reis) cu ta sali for di tera of awa unda cu e por absorba oxigeno directo for di aire.

Zwartmangel of Mangel Preto ta un mangel sabi, e ta chupa e awa salo for di tera, pas’e door di su troncon pa yega na e blachinan.  For di su blachinan e ta elimina e salo. Bo ta reconoce esaki door di e formacion di plekinan blanco, salo concentra, riba e blachinan. E concentracion di salo por crea buraco, pasobra e ta come e blachi su paden. E blachi ta sigui crece y e buraco tambe ta bira mas grandi y depues di esey, e ta cay.

E Zwartmangel ta plama holo ora solo baha y ora solo subi. Zwartmangel su blachi a mustra shinishi; e ta un otro berde compara cu e otro sorto di mangel.

Tambe tin diferente uzo pa e zwartmangel. E Zwartmangel chikito por come den caso di necesidad, pero mester herbe bon prome sino e ta venenoso. E ta un fuente di honing pa bij/abeha den e area di nos costa, e tin flor na adundancia. E ta conoci pa produci un calidad halto di honing. Su troncon tin propiedad medicinal. Tambe ta uza e salo procedente di e blachinan den nos cushina.