Den cuadro di e dia importante aki, Departamento di Naturalesa y Medio Ambiente kier subraya e importancia di un di nos sorto di mangelcu ta e mangel Tam.
Mangel Tam ta haya su nomber na Papiamento pasobra un siglo pasa tawata uza liña di catuna y agave gevlecht cu otro pa pisca. Nan tawata tam e liña di pisca cu e simia di e Mangel Tam pa percura pa liña no putri. E salo ta concentra den e simia cu ta conserva.
Mangel Tam ta biba den habitat extremo unda lama ta topa tera. Un di e caracteristicanan di e Mangel Tam ta cu su reis ta cana drenta lama. E reis (steltwortels) ta duna e mata sosten den awa y lodo. Aki ta unda hopi pisca chikito, cocolishi y otro organismo marino ta sconde y come. E reis por produci awa dushi for di lama door di su habilidad pa filtra e awa. E reis tambe ta forma un tera firme y ta proteha nos costa contra erosion y horcan.
E simia di e Mangel Tam tin un punta skerp. Ora e simia cay na suela, e ta cay manera un torpedo den e lodo of ta keda drif te unda e toca suela y eynan e ta cla pa crece. Mangel Tam su blachi ta berde scur bunita, su flor geel ta mes briyante cu e strea ariba Aruba su bandera.
Tin hopi mas uzo pa e diferente parti di e Mangel Tam, un di nan ta e te di su reis. Ta duna e te na mucha cu ta pishi kama anochi. E Mangel Tam ta presente entre otro na Spaans Lagoen, Mangel Halto y na Santo Largo na Savaneta.
Share this page