En conexion cu e celebracion di dia Internacional di Felicidad cu a celebra riba 20 di maart ultimo, Oficina Central di Estadistica (CBS) ta publica un relato cortico di e datonan preliminar di e Encuesta di Bienestar Social 2017. E datonan aki ta refleha e estado di felicidad di e poblacion di Aruba como tambe e relacion entre felicidad y e satisfaccion cu diferente area importante den Bida.
E encuesta di Bienestar Social 2017 a conta cu e participacion di un total di 2012 persona adulto di 18 aña bay ariba. E resultadonan preliminar ta mustra cu 84% di e poblacion adulto a sinti nan mes feliz e dia prome cu e encuesta. Esnan cu a sinti nan mes mas feliz tabata hende homber entre 18 y 24 aña di edad. Esnan cu tabata sinti nan mes menos feliz tabata hende muher di 65 aña di edad of mas.
Den e graficonan adhunto por lesa e resultadonan obteni. Di esnan cu a sinti nan hopi feliz:
- 88.9% tabata hopi satisfecho cu nan bida familiar
- 72.7% tabata hopi satisfecho cu nan matrimonio of pareha
- 73.3% tabata hopi satisfecho cu nan tempo liber
- 70.1% tabata hopi satisfecho cu nan trabao (pa personanan emplea)
- 69.5% tabata hopi satisfecho cu nan standard di bida
- 66.2% tabata hopi satisfecho cu nan salud
- 63.4% tabata hopi satisfecho cu nan participacion den e bida social normal
- 60.9% ta hopi satisfecho cu e balansa entre nan trabao y vida (pa personanan emplea)
CBS lo publica e resultadonan final di e Encuesta di Bienestar Social 2017 dentro di poco. Den e publicacion aki, ta haci un analisis profundo di tur e areanan relata cu bienestar social di poblacion di Aruba.
Share this page