Dia internacional di Biodiversidad 22 mei, nos ta parti di e solucion ta e tema

ORANJESTAD - Aña pasa Directie Natuur en Milieu (DNM) a trece padilanti pa e ocasion di observacion di e dia internacional di Biodiversidad e topiconan di enfoke manera con hende ta parti di naturalesa y no ta un componente separa.    

A haci e yamada pa nos refleha con ta anda cu naturalesa y kico por haci pa yuda e biodiversidad. Algun di e ideanan y accionnan a inclui: planta matanan local, piki y warda simianan di e matanan, proteha nos flora y fauna local, cuida abeha, join un NGO di naturalesa y comparti informacion cu otro riba e temanan aki. E aña aki ta pidi comunidad global pa revisa cua relacion nan tin cu e mundo di naturalesa. Asina tambe e tema pa 2021 ta enfatisa cu “nos ta parti di e solucion”.

Aunke nos ta disfruta di hopi avancenan tecnologico ainda mundo henter ta depende completamente di un biodiversidad sano y ecosistemanan yen di bida pa nos awa, cuminda, medicina, paña, energia y proteccion pa menciona algun.

Dia internacional di Biodiversidad 22 mei, nos ta parti di e solucion ta e tema.

Pero papia di Biodiversidad no ta un tema facil di compronde. P’esey na nivelnan internacional tin diferente evento di dialogo ta tuma lugar, manera e di 15 reunion pa Convention on Biological Diversity (CBD) caminda lo repasa e plan strategico pa Biodiversidad 2011-2020 cu a caba di transcuri. Tambe ta anticipa decisionnan final pa e era despues di 2020 pa loke ta trata e framework global di preservacion di biodiversidad. Ademas, e esfuersonan pa sostene biodiversidad lo presenta dos observacion di decada pa e periodo 2021-2030, cual ta e Decade of Ocean Science for Sustainable Development 2021-2030 (https://en.unesco.org/ocean-decade)   y e Decade on Ecosystem Restoration di Nacionnan Uni 2021-2030 (https://wedocs.unep.org/bitstream/handle/20.500.11822/30919/UNDecade.pdf).

DNM ta encurasha un y tur pa keda bon informa di e tema y vocifera bo preocupacion pa yuda naturalesa y e biodiversidad crece. Por sigui e desaroyonan mundial y temanan tocante biodiversidad riba pagina di International Day for Biological Diversity - May 22 (www.cbd.int/idb/

Riba e plataforma ey lo comparti e raportnan riba e conservacion di e decada cu a pasa. Asina nos por wak kico a bay bon y unda nos ta keda haci esfuersonan conhunto pa preservacion di naturalesa pa un biodiversidad di nivel halto.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options