Dia Internacional di Adulto Mayor y e retonan cu adultonan mayor ta confronta

ORANJESTAD - Riba Riba october 1, dia internacional di Adulto Mayor, crioyamente bisa dia di nos grandinan, Departamento di Salud Publico, Seccion Cuido di Nos Grandinan kier a trece conscientisacion den nos comunidad riba e retonan cu adultonan mayor ta confronta.

Conforme cifranan di Censo2020, 17.288 persona di nos poblacion ta 65+ cu ta 16% di nos populacion.

Tema pa 2021 di Nacionnan Uni en conexion cu dia Internacional di Adulto Mayor
ta: “Igualdad Digital pa tur edad”. E tema aki ta afirma e necesidad di acceso y participacion significativo den e mundo digital di esnan adulto mayor. Y esaki sigur ta bin bek den e retonan cu nos grandinan ta confronta cune.

Nos grandinan.Na Aruba e accesibilidad pa cu e mundo digital ta hopi halto, 71% di esnan 65+ tin conexion di Internet di un of otro forma. Esaki sigur ta hopi positivo y necesario mirando cu e mundo di tecnologia ta avansando hopi lihe. Loke ta trata e conocimento di uzo digital si ta hopi abou entre nos adultonan mayor.

Mientras cu mundo completo ta haciendo esfuersonan pa conecta mas hende cu otro, riesgonan nobo a bira evidente. Un ehempel di esaki ta e delitonan cibernetico y mal informacion ta menasando e derechonan humano, privacidad y seguridad di adultonan mayor.

Importancia di uzo digital durante pandemia di covid-19
Desde aña pasa nos ta experenciando e pandemia di COVID-19. Esaki a trece hopi cambio cune den maneho di cuido di adultonan mayor tur rond mundo; mirando cu esnan clasifica como adulto mayor ta pertenece na un di gruponan mas vulnerabel y cu risico halto pa contrae COVID-19.

Hopi famia no por a bishita of mira nan ser keri y esaki a haci cu esnan den cas di cuido tabata sufri mentalmente y emocionalmente. Akinan ta caminda e importancia digital ta prevalece. E unico manera cu por a mantene contacto cu nan famia tabata atraves di videocall uzando i-pads y telefon cellular (chikito, manera nos grandi nan ta yame) pa comunica cu nan famia y asina tambe pa nan por a wak otro.

E aña aki, Gobierno di Aruba, en conexion cu e fecha internacional di aldulto mayor a declara e luna di october como luna pa conscientisacion di adulto mayor. Seccion Cuido di Nos Grandinan ta bay tin un segmento special pa conscientisa nos comunidad riba e retonan cu adultonan mayor ta confronta. Keda pendiente riba e pagina di Facebook di DVG.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options