Despues cu pa 2 aña cu e plataforma www.earthday.org a organisa eventonan den forma digital, e aña aki lo no ta diferente. E biaha aki lo tin combinacion di algun sesionnan online y via livestreaming den cada pais. DNM tambe lo tin un evento den forma di colaboracion conhuntamente cu Monumentenfonds, unda cu e edificio Uncle Louis Store ta ricibi un premio como monumento, como tambe pa cu su calidadnan sostenibel. E tema “Ban inverti den nos planeta” riba 22 di april Earth Day ta pa motiva comunidad pa haci actividadnan boluntario manera un clean-up of plantamento di mata pa e bienestar di nos medio ambiente y Mama Tera.
Riba e plataforma www.earthday.org por wak e live webinar- y serienan realisa cu ta enfoca riba empoderamento di hobennan. Tambe por wak riba e mapa kico cada pais y nan organisacionnan ta haciendo riba e dia aki. Na Aruba, nos por aprecia cu algun organisacion a registra nan evento. DNM ta enfoca riba e tema di: Pakico ta importante pa incorpora esfuersonan sostenibel ora di renoba edificionan monumental.
Riba e dia aki e edicifio den cua DNM ta ubica actualmente ta ricibi e premio Pieter van Vollenhoven 2022. E edifico renoba ta uno cu cualidadnan sostenibel. Algun ehempel di esakinan ta e awa procedente di e airco ta bay pa un tanki dedica cu ta uza pa flush e toiletnan. Drain di toiletnan si ta bay via sistema di riolering pa RWZI na San Nicolas. E edificio tin solar panel instala riba dak. E sistema di luz y airco ta programa pa solamente ta activo ora cu ta oranan di trabou y cu tin movecion. E porta y bentanan tin blokeo pa solo y pa calor no drenta paden.
DNM conhuntamente cu Plastic Beach Party (PBP) a logra cu PBP a pone panelnan di plastic recicla pa proteha contra solo y tambe yuda e sistema di airco. Asina nos ta contribui tambe na e sistema di bida circular pa loke ta trata plastic. Parti paden na DNM, ta colecta tur plastic y ta uza e servicionan di PBP pa entrega esakinan pa wordo recicla.
DNM ta contento cu e premio cu e edificio a logra obtene y tambe cu ta riba e dia di Mama Tera 2022 ta e dia cu ta ricibi esaki. Asina pone enfoke riba un edificio monumental cu cualidadnan sostenibel cu ta aporta na nos medio ambiente. Tur edificio tin nan historia y Uncle Louis Store tambe tin di dje mescos cu e dia Mama Tera tambe conoce su origen.
Historia di dia di Mama Tera: E idea di dia di Mama Tera tawata iniciativa di senador di Merca pa Wisconsin, Sr. Gaylord Nelson. E prome Earth Day a yuda na introduccion di United States Environmental Protection Agency (US EPA) y a logra di tin leynan pa aire y awa limpi, como tambe bestianan protegi. E organisacion Earthday.org ta e organisacion mundial mas grandi pa loke ta trata nos medio ambiente.
E tema pa e aña aki ta pa inverti den nos planeta. Esaki kiermen pa tuma accion, inverti bo tempo y participa den bo comunidad. Un di e accionnan mas simpel ta pa haci un clean-up den bo bario, beach of cura di cas. E iniciativa di Earthday.org ta inclui e Great Global Clean-up, na unda gruponan por registra nan evento di haci un area limpi. Esaki ta un actividad di y pa comunidad cu ta beneficia e medio ambiente. E impacto positivo aki no lo beneficia solamente bo bario of pais, pero planeta Tera. Door di participa den actividadnan aki hende ta bira mas consciente di nan mes habito y relacion cu desperdicio. Nan meta ta pa un observacion civico mas grandi na mundo cu participacion di mas cu 1 biyon di hende den 192 pais tur aña. E otro accion ta the Canopy Project cua ta encera plantamento di mata rond mundo. Desde 2010 Earthday.org a logra activa hende y a logra planta 10 miyon di mata rond mundo. Cu e initiativa aki kier logra reforesta areanan cu tin necesidad di rehabilitacion y otro na unda comunidadnan cu ta na riesgo pa cambio di clima. Na Aruba tambe nos tin organisacion manera Ban Lanta y Planta cu tin necesidad di boluntarionan, fondonan y tambe ta en busca di posibel localidadnan pa planta matanan na unda esakinan por keda protegi y ta haya awa.
DNM ta desea pa e comunidad di Aruba ta mas activo riba dia di Mama Tera door di tene Aruba limpi y ts consciente di e impacto di desperdicio cu nos ta genera. Planta un mata nativo den bo cura, cuid’e y dun’e awa pa asina mañan e generacion nobo por disfruta di esaki, asina ta lage como un herencia pa esnan cu ta bini. E Earthday aki tuma bo accion, inverti den nos planeta y comparti cu nos riba plataforma social di @Dnmaruba cu un potret usando #InvestInOurplanet #WhatWillYouDo #EarthDay #EarthDayEveryDay #ClimateChange #Environment #Sustainability #TakeAction #Nature #Aruba
Share this page