Durante e dia aki e diferente orador di Hulanda y Aruba lo enfoca riba e impacto cu digitalisacion tin riba e formacion di documentacion digital, particularmente pa loke ta trata nos herencia cultural y historia.
E diferente orador lo trece dilanti un bista di e retonan, opcionnan y tambe e posibel solucion pa e conservacion di informacion, den un forma digital sostenibel y duradero.
Algun di e oradornan y nan presentacion:
- E orador principal ta Sr. Drs. Marens L. Engelhard cu ta Algemene Rijksarchivaris & Algemeen Directeur Nationaal Archief Nederland. Prome cu e funcion aki e tabata director di Stadsarchief Amsterdam den e funcion di gemeentearchivaris. Durante su presentacion Sr. Engelhard lo duna su vision riba e formacion di informacion digital y e consecuencia cu esaki tin. Esaki relaciona cu su publicacion titula “Op weg naar 2020 en verder”. Tambe e lo elabora riba e cambio cu esaki ta trece cu ne y kico esey ta significa pa e tereno di archivo y e funcion di archivo en general. Tambe e lo trata e diferente legislacion (AVG y WOO wetgeving).
- Un otro orador di Hulanda, Sr. Paul Geerders cu ta un consultant na P.G. Consultancy y tambe docente na GO-Opleidingen Nederland lo enfoca riba e tereno di sostenibilidad di informacion cual e lo trece dilanti den su presentacion titula: “Informacion, essential base for sustainable development”. E lo duna entre otro den su presentacion un bista di e retonan (y tambe e posibilidadnan) cu tin nos dilanti pa loke ta trata e herencia cultural den e era digital y e preservacion di esaki.
- E orador principal di Aruba ta Sr. Drs. Raymond R. Hernandez cu ta e director di Archivo Nacional Aruba. Den su presentacion titula “Vol verwachting klopt ons hart” e lo splica den e perspectiva di archivo en situacion di Aruba y trece dilanti e inquietud pa loke ta e digitalisacion, particularmente pa e conservacion y durabilidad di e informacion digital. Con lo warda den futuro documento produci awendia?
- Banda di e oradornan menciona, tambe tin mas orador di Hulanda y Aruba. Entre otro Sra. Migiza Victoriashoop Msc, Adviseur Digitale Informatievoorziening - Waterlands Archief Nederland & Vertegenwoordiger Kennisplatform Informatiehuishouding Overheden y Sr. Eric Kokke, Docent & Marketing Manager GO-Opleidingen Nederland.
Pa loke ta trata nos instancianan local, Shensly Tromp, IT Director di Aruba Airport Authority, lo presenta con a implementa un sistema digital den nan organisacion. Sr. Tromp ta parti di e Management Team y ta responsabel pa e digitalisacion y innovacion na aeropuerto di di Aruba. Sr. Tromp lo duna un presentacion di e sistema digital di “Happy Flow” cu ta unico na mundo y cu ta uza “facial recognition” pa facilita e proceso di biahamento na aeropuerto.
Tambe lo duna nan presentacion representante di Arubabank NV y ITP-Caribbean International.
E idioma di e presentacion(nan) ta na Hulandes y na Ingles.
E Dia di Informacion ta tuma lugar dia 27 di September 2019 na Renaissance Convention Center di 8.00 a.m. pa 4.00 p.m. E contribucion di participacion ta Awg. 125,- p.p. (c uta inclui lunch y na final di atardi lo tin un momento pa haci networking)..
E evento aki ta haci posibel danki na e sosten di nos partners: Archivo Nacional Aruba, UNOCA Aruba, GO Fonds Nederland, Prins Bernhard Cultuurfonds Caribbean, ITP-Caribbean y Arubabank.
Pa mas informacion di registracion y of di e evento por tuma contacto cu Fundacion Amigonan di Archivo na telefon: 567-4118 of email: fundacion.ada@gmail.com. Tambe por registra via e formulario di registracion.
Nos ta conta cu bo(so) participacion “Futuro no ta warda!”
Share this page