Di dos TdQ ta legitimo: Ministerio Publico ta haci yamada na personanan pa bin paga mas liher posibel of cera areglo

ORANJESTAD - Hues a dicidi riba 5 di november 2020 cu e Toque de Queda (TdQ) cu a introduci riba 28 di augustus ultimo via un regeling ministerial, tin suficiente base legal y ta legitimo.

Corte a dicidi cu e escogencia di gobierno pa introduci e (segundo) Toque de Queda ta rasonabel bao di e circunstancianan di e crecimento exponencial di e cantidad di contagio di coronavirus. E TdQ no por wordo considera desproporcional bao di e circunstancianan aki.

E dos sospechosonan cu a wordo cita pa motibo di violacion di e TdQ, a wordo sentencia pa respectivamente servicio pa comunidad y un boet di 1000 florin. Manera conoci Ministerio Publico tabatin un otro punto di bista, pero hues no a sigui esaki. Ministerio Publico ta haci, awor cu hues a dicidi cu e TdQ ta corecto, un yamada urgente na e personanan cu tin un boet di TdQ habri, pa nan paga esaki mas pronto posibel. Ta trata di personanan cu a wordo ofreci un transaccion (haya un boet) den e periodo di 28 di augustus 2020 y 22 di october 2020 pa violacion di TdQ.

Bo persona por paga e boet aki online via cuenta bancario 4000905 di Aruba Bank bao mencion di e parketnummer, e codico di pago y e number di ID. Bo persona por haci un afspraak tambe via nos website (www.omaruba.com) pa pasa personalmente na caha di Ministerio Publico. Si bo persona ta desea pa yega na un areglo di pago, por fabor manda un e-mail cu informacion y number di telefon pa info@omaruba.aw

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options