Desaroyo actual rond di Novel Coronavirus

Dit item is gearchiveerd op 23-02-2020.

ORANJESTAD -  Ultimo informacion cu Departamento di Salud Publico di Aruba a ricibi for di World Health Organisation (WHO) relaciona cu novel Coronavirus, ta indica cu tin por lo menos 448 caso confirma y 9 caso di morto regista. 

CoronavirusA raporta mayoria di e  casonan aki den diferente region di China, pero tambe na Japon, Republica di Korea, Thailandia y un caso na Merca te cu 22 di januari 2020.

Na Aruba actualmente no tin ningun caso sospechoso y mucho menos caso confirma di novel Coronavirus. Departamento di Salud Publico ta comunicando cu diferente organisacion y disiplina riba e tereno aki pa asina reinforsa nan sistema di “surveillance” y “monitoring”  pa si encaso un posibel caso presenta. Te na e momento aki WHO no a emiti ningun restriccion di biahe y of comercio pa China.

Segun e expertonan e virus di novel Corona ta wordo transmiti di hende pa hende y ta duna sintomanan cu ta afecta e sistema respiratorio manera:

  • Calafrieu;
  • Tosamento;
  • Keintura;
  • nanishi ta core;
  • nister;
  • dolor di musculo

y den casonan severo:

  • problema di riñon;
  • pulmonia;
  • y hasta morto.

Na e comunidad Chines cu ta biahando pa China pa celebra aña nobo Chines y na comunidad di Aruba nos ta recomenda pa sigui e recomendacionan di WHO pa aplica medida di higiena general manera:

  • Laba man frecuentemente cu awa y habon of uza “hand sanitizer”;
  • Tosa of nister den kleenex desechabel of den elleboog’
  • Y evita contacto cu e personanan cu sintomanan di griep.

Si bo a bishita un pais cu caso confirma di Novel Coronavirus y bo presenta sintomanan respiratorio (vooral cu bo tawatin contacto cu hende malo cu sintomanan di griep) tuma contacto cu bo dokter di cas mas pronto c uta posibel y dun’e informacion di bo historia di biahe.

Pa mas informacion por tuma contacto cu Departamento di Salud Publico na 5224200 y LIKE nos Facebook Page Directie Volksgezondheid DVG Aruba https://www.facebook.com/desparuba/ pa keda informa.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options