Departamento Recurso Humano(DRH) ta inicia un trayecto di un sistema yama “prestatiemanagement”

E meta tras di e sistema ta e desaroyo di e empleado publico pa asina mehora e calidad y eficiencia di e aparato gubernamental.

Gobierno di Aruba a duna DRH e mandato pa inicia e trayecto piloto di “Prestatiemanagement”. Den esaki a inclui participacion di e sindicatonan y nos empleadonan publico den su totalidad.

Pa implementa e Prestatiemanagement, a organisa un proyecto piloto na unda 38 departamento di Gobierno a participa exitosamente. Awor ta sigui cu informacion y workshop na e demas departamentonan di Gobierno.

E parti legislativo di e sistema, ta den desaroyo hunto cu DWJZ y pa asina e Prestatiemanagement drenta na vigor pa 1 januari 2023. 

E siman di 12 pa 19 september 2022, DRH lo continua cu e proceso di preparacion pa implementacion di e sistema. E demas departamentonan di Gobierno lo ser invita pa atende un “Prestatiemanagement Workshop”, durante cual e departamentonan aki lo ricibi informacion y training riba e trayecto.

DRH lo mantene sector publico di Aruba informa di e desaroyonan den e proximo dianan, pa asina un y tur por adkiri mas conocemento di e sistema y asina aporta constructivamente tambe na e Proyecto “Prestatiemanagement”.