Curso “Empresario Prepara II” ta cuminsa riba 5 september 2022

ORANJESTAD - Riba 5 september proximo Iniciativa pa Desaroyo di Empresa Arubano (Idea) ta presenta su curso “Empresario Prepara II” cual ta organisa door di Departamento di Asuntonan Economico, Comercio y Industria.

Ta duna e curso aki desde aña 2012 cu IDEA ta existi. IDEA e aña aki a cumpli 10 aña di existencia den luna di februari y un di e servicionan mas importante di IDEA ta e parti di educacion pa tur persona cu ta desea di habri un negoshi of cu tin un negoshi existente.

Meta di e curso aki ta:

  • Pa yuda nos clientenan y futuro empresarionan crea un cultura innovativo den nan negoshi;
  • con pa cumpli cu nan debernan cu e pago di impuesto;
  • con pa diseña un website y sigui engrandece e nivel di informacion y strategia pa haci di nan negoshi uno exitoso;
  • con pa maneha nan negoshi den un forma mas eficiente y manera debe ser.

E curso ta consisti di e siguiente topiconan:

  • Create a Culture of Innovation, presenta door di sr. Edward Erasmus
  • Small Business Tax, presenta door di sra. Cindy Clark
  • Developing Brand Awareness for Customer Satisfaction, presenta door di sr. Neville Thode
  • Leadership and Management, presenta door di sr. Dave Martinus

Empresario Prepara lo cuminsa dia 5 september 2022 y ta consisti di 19 les (dos biaha pa siman, riba dialuna y diaranson). E curso lo termina 14 november 2022. Orario ta 7.00 pm pa 9.15 pm y pa e lesnan lo tin un schedule cu lo mester tene cuenta cune. Den e prome siman di october lo tin dos dia di vakantie, riba 3 y 5 di october. Lo duna e curso riba e plataforma di Microsoft Teams. Un sistema mas facil pa por participa na un curso via cas y mas trankilo, despues di un dia di trabou.

Curso “Empresario Prepara II” ta costa solamente Afl. 285,-. E ta un suma bastante rasonabel pa por cubri e gastonan pa paga nos docentenan. Maximo participacion ta conta pa completa e curso y na final di cada topico, e participante mester pasa cada examen cu exito pa logra e certificado.

Criteria pa atende curso “Empresario Prepara II”:

  • Ta preferibel pa tin nivel di MAVO of ekivalente. Diploma no ta necesario;
  • Mester tin conocemento di computer y di e plataforma Microsoft Teams;
  • Conocemento basico di Papiamento, Hulandes y Ingles ta necesario.

Pa mas informacion y inscripcion por yama oficina di IDEA na 521-2439/521-2440/521-2400 of por manda un email na info@idea.aw of L.croes@deaci.aw.

Tambe por like IDEA su Facebook pagina: Idea-Aruba

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options