Cuerpo Especial Arubano a ricibi cinco transportwagens nobo for di Hulanda

A base di un convenio cu tin existente pa basta aña caba entre Aruba y Hulanda, ta traspasa autonan di Hulanda cu ta den bon estado pa Aruba. Den e caso aki, a traspasa cinco transportwagens pa e departamento di CEA, specificamente e unidad di transporte, pa asina nan por haci nan trabou debidamente.

Durante e bishita aki minister Tjon a haya un splicacion amplio di e personal di CEA di e transportwagens aki. Ta trata di transportwagens di bon calidad, den e caso aki, Mercedez Benz, cual ta completamente ekipa cu e ultimo den tecnologia y camaranan paden pa e parti di siguridad, pa e preso cu ta transporta como tambe e personal.

E mandatario a expresa di ta contento cu e parti aki a keda finalisa, y durante su combersacion cu e director di CEA esta Sr. Ronny Geerman, a keda conclui cu e ta importante pa yega na un plan structural, caminda lo bay reemplasa e autonan cu autonan nobo na tempo. Combersacionnan cu Hulanda ta andando pa por yega na un “vervangingsplan” asina dentro di poco.

Na final di dia ta trata di inversionnan cu ta importante pa e personal. E prioridad ta pa inverti den e personal y percura pa nan tin e materialnan necesario pa nan por haci nan trabou debidamente y na un manera hopi mas sigur.