Cu e uitvoeringsagenda lo reconstrui Aruba

ORANJESTAD - Inicio di luna di februari, Aruba y Hulanda a firma e ‘Uitvoeringsagenda’, Agenda di Ehecucion como paso nobo den e cooperacion entre Hulanda y Aruba.

Prome Minister Evelyn Wever-Croes a duna di conoce, ta e uitvoeringsagenda un paso grandi pa logra recuperacion economico mas lihe.

Den e mesun siman, Gobierno tawata den Parlamento pa duna informacion tocante e Landspakket y Uitvoeringsagenda. Cada minister a duna splicacion di e palabracionnan haci den cuadro di e Landspakket.

Kaft Agenda di ehecucion (Uitvoeringsagenda) landspakket 1 februari - 1 april 2021PROCESO di uitvoeringsagenda:  

E uitvoeringsagenda (agenda di ehecucion) ta e resultado di un proceso intensivo durante cua pais Aruba y Hulanda a yega na un acuerdo pa sosten di likides a base di e Landspakket firma 13 di november 2020. Despues di e periodo aki tanto Hulanda como Aruba a apunta un asina yama Tijdelijke Werkorganisatie (TWO) pa fungi como procesbewaker y pa percura cu e trabounan preliminario tuma luga den bon forma.

Aruba a apunta un asina yama 'trekker' cu ta profesional den sector publico cu experticio specifico relaciona cu e tema di e Landspakket. Asina TWO-AUA, profesional local y e ministernan ta forma e ecosistema di maneho di e Landspakket pa Aruba.

Por indica cu e intencion ta pa cada kwartaal crea un agenda di ehecucion cu ta sigui e agenda di ehecucion anterior den forma coherente y cronológico, pa por tin un acercamento integral.

E prome agenda di ehecucion aki tabata resultado di varios sesion intensivo cu varios experto y profesional di diferente sector durante e prome luna di e aña aki.

Adicionalmente, por bisa, cu banda di e plan di ehecucion aki ya caba Pais Aruba a cumpli cu varios palabracion haci, hasta prome cu e deadline stipula. 

E agenda di ehecucion ta un documento dinamico cual e version aki, a keda oficialisa durante reunion cu secretario di estado señor Knops, prome di februari ultimo.

Tabata un proceso encamina conhuntamente, durante cua e ekipo di ambos pais a delibera estrechamente cu otro.

Temanan di e Agenda di Ehecucion di Landspakket 1 februari  - 1 april 2021.E agenda di ehecucion ta rekeri esfuerso maximo di tur esnan involvi mirando cu hopi biaha Aruba no tin e capacidad extenso di personal ni recurso cu Hulanda tin. Varios biaha ta e mesun profesionalnan ta encarga cu diferente tarea importante.  E punto aki nos ta, y lo keda enfatisa cerca Hulanda.

Ministerio di Asuntonan General:

Pa locual ta e ministerionan cu ta cay bou di Asuntonan General, Prome Minister a indica cu sigur tin trabou grandi pa haci. Asina, tin algun tarea clave stipula pa e.o. DRH relaciona cu condicion di trabou y transforma e sistema di HR di gobierno den uno adecuado pa futuro. Aki lo enfoca e.o. tanto riba prestacion y motivacion di empleado, condicion di trabou, como eficiencia den e sistema. Asina, ta baha gasto como tambe crea un aparato resiliente. Esencial den esaki tambe ta e tema di digitalisacion. Pa locual ta e aspecto aki, ya Pais Aruba a tuma paso grandi den forma di E-government. 

Esencial den e trayectonan menciona ta cu e agenda di ehecucion ta e prome paso pa trata e diferente temanan. Asina lo haci analisis y tene consulta necesario prome cu por yega na toma decision balansa.  

Algun di e prome fechana relevante pa cu trabounan cu tin cu tuma luga ta:

  • entrega plan di accion pa analisa sistema di HR di sector publico y asina bin cu mehoracion di esaki 5 di februari 2021 (B8)
  • entrega plan di accion pa analisa condicion di trabou pa medio di experto externo sosteni door di experto interno den sector publico y semi publico 1 di maart 2021 (B5)
  • Crea un plan di accion 15 di maart 2021 pa un analisis di eficiencia organisatorio di aparato gubernamental (B4)
  • Analisa prestacion di personal actual di sector publico 1 di mei 2021 (B6)

MASTERPLAN REPOSICIONANDO RUMBO DI NOS PAIS

E landspakket ta toca varios tema cu lo por conduci na un Aruba resiliente door di stimula cierto desaroyo y baha gasto. Sinembargo tin algun tema cardinal pa nos pais cu rekeri mas elaboracion. Esaki ta por ehempel; stimula un desaroyo economico nobo, medio ambiente y cambio di clima.

E temanan aki lo trata mas detayadamente den e Master Plan Resposicionando e Rumbo di nos Pais, cu ta e plan na cua mas di 125 profesional di sector publico y priva a traha. Pa e motibo aki a haci esfuerso pa alinea e dos plan y trayectonan aki pa asina Aruba por percura pa yega na un miho resultado pa nos isla.

Por haya mas informacion den e Agenda di Ehecucion di Landspakket 1 februari  - 1 april 2021

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options