COVID-19 a trece cambio den celebracion di Dia di San Juan

ORANJESTAD – Minister di Cultura, mr. Xiomara Maduro ta informa cu COVID 19 a trece cambio den e celebracion di Dia di San Juan riba diaranson 24 di juni.

Debi cu no por tin aglomeracion di hende, no por tin e celebracion den Centro di Bario manera custumbra. E aña ako lo bay bek na e manera di celebracion di antes, esta un fiesta den sabana na cas hunto cu famia. Alabes tin un peticion di brandweer pa no cende candela, ya cu esaki ta malo pa nos salud, specialmente awor cu na Aruba tin e situacion di e stof di Sahara.

Buki Shon Wantomba y e celebracion di Dia di San JuanShon Wantomba y e Fiesta di San Juan

Departamento di Cultura (DCA) a prepara un Proyecto Escolar di Dera Gay 2020. E aña aki lo ofrece na tur alumno di e prome klas di scol basico, como na alumnonan cu a bin di scol preparatorio, e buki titula: Shon Wantomba y e celebracion di Dia di San Juan, un buki di storia di e celebracion di Dia di San Juan. E storia ta skirbi pa Edselyn Figaroa y ta diseña y ilustra pa Sra. Leidys Ledezma.

Ademas tur scol basico lo ricibi un USB cu e contenido di un film cortico di e buki Shon Wantomba y e celebracion di Dia di San Juan. E scolnan por haci un presentacion pa e scol completo of cada klas por pas’e pa e muchanan wak. Departamento di Cultura (DCA) lo entrega e buki y USBnan na tur scol basico. Pa mas informacion por tuma contacto cu señora Marlene Lampe na number di telefon: 582-2185.

Collage di potret fiesta Cultural San Juan/ Dera GayPrograma Special na Television Fiesta di San Juan ‘Dera Gay’

Ministerio di Cultura, UNOCA, Departamento di Cultura y Comision Celebracion di Dianan Nacional hunto cu TeleAruba ta bay presenta un programa di television Fiesta di San Juan ‘Dera Gay’. Esaki lo ta un programa en bibo cu lo pasa diaranson dia 24 di juni, di 6 ‘or di atardi pa 8 ‘or di anochi na canal 23 y canal 42.Den e programa aki lo trece dilanti con tabata celebra Dia di San Juan antes den sabana di cas hunto cu famia. Lo tin presentacion di banda Tipico, Grupo di Baile, Entrevista, Wega pa medio di pregunta cu e televidente lo por participa y gana premio.

Minister di Cultura ta invita pueblo en general, specialmente mayornan pa wak e programa aki hunto cu nan yiunan.  Ta importante pa nos muchanan ta bon informa riba e fiesta y tradicion popular di  Fiesta San Juan, Dera Gay cu ta un di e celebracionnan mas popular di herencia cultural di Pais Aruba.

Grupo di baile di mucha San Juan/ Dera Gay Origen

Fiesta cultural di San Juan (Juan Bautista) den boca di pueblo yama Dera Gay ta data desde aña 1862 y ta celebr’e tur aña riba 24 juni.

Tanto gobierno como organisacionnan cultural particular ta haci e preparacionnan necesario pa e fiesta cultural riba 24 juni proximo, e dia di San Juan Bautista y e deramento di gay. Tin varios storia tocante origen di e fiesta religioso y cultural di pueblo.

Origen religioso ta relaciona cu fecha di nacemento di San Juan Bautista. Origen cultural ta mustra riba e fiesta di cosecha. Aunke Dera Gay ta mas tanto conoci como un fiesta cultural cu entre otro musica, baile y canto. Colornan cu ta domina ta cora y geel.  Geel ta simbolisa e palo di Kibrahacha cu ta floria y cora como simbolo di candela cu ta cende riba e anochi prome pa anuncia e fiesta di e siguiente dia.

Baile San Juan/ Dera Gay Segun tradicion e fiesta ta cuminsa dia 23 di juni ora cu e cunukeronan ta cende sobra di palo di maishi na candela y p’asina cuminsa prepara pa e temporada nobo di cosecha. E cendemento di candela ta manera un limpiesa pa despues pa cuminsa di nobo.

Dia 24 di juni, despues di bahada di solo, e fiesta di San Juan ta cuminsa den diferente districto cu baile di Dera Gay, baile di bula candela y baile di bandera. E baile di candela ta pa proteccion contra malesa y mala suerte. E baile mas conoci t’esun di Dera Gay, unda e hende homber cu su wowo tapa y c’un palo den su man mester purba mata e gay. Antes e bailamento aki ta tuma luga den sabana cu un gay bibo dera. Awendia ta uza sea un gay traha y e baile ta den club. Esnan cu ta baila ainda den sabana of riba veld di tera ta uza un calbas.

Tambe tin un baile di bandera, unda ta pone diferente banderin den suela y un persona cu wowo tapa cu lenso ta busca e banderinnan. Ceremonia ta acompaña pa musica y cantica folklorico. E instrumentonan musical cu ta resalta ta violin, wiri y tambu. E cantica ta data desde 1862. Tambe tin hopi cuminda y bebida durante e celebracion aki.

Palo di maishi cendi na candela riba dia di San Juan/ Dera GayHenter e baile ta tuma luga bou tocamento y cantamento di e cantica di San Juan. E instrumentonan musical mas uza ta fio, wiri, raspa y tambu. E cantica ta conoci for di 1862. Cuminda y bebida na abundancia tambe ta  parti di e fiesta.

E fiesta di San Juan y Dera Gay a bira hopi popular atrobe despues di añanan setenta bou di poblacion local como tambe na e scol ta duna atencion na e fiesta popular aki.

Adhunto por haya e foyeto relaciona Dia di San Juan.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options