Control di prijs di producto den canasta basico ta tuma lugar tur dia

E control diario di prijs maximo ta necesario pa garantisa cu no tin abuso di prijsnan di e productonan regula door di Minister di Asuntonan Economico, cu den boca di pueblo ta conoci como e “canasta basico”.  Durante un control di prijs di productonan por haya algun cu no ta cumpli cu e prijsnan stipula pa ley, aunke esaki no sa pasa hopi.  Unabes constata un abnormalidad, e controlado lo pidi pa e supermercado of minimarket adapta e prijs di biaha.

Stipulacion di prijs maximo ta regla den e ley “Prijzenverordening AB 1991 no. GT 17”. E prijzenverordening ta duna Minister di Asunto Economico e autoridad pa stipula e prijs maximo pa diferente producto si e prijs cu comerciantenan ta pidi pa e productonan ta afecta e interes comun.

Mirando e subida di prijsnan internacional  di varios producto di consumo y e situacion financiero dificil di e ciudadano, Minister Wever recientemente a amplia e canasta basico. 

E canasta basico actualmente ta contene e siguiente productonan:

• Aros;
• pasta-spaghetti;
• papa;
• cornflakes;
• hariña;
• te;
• koffie (koffie puiro);
• cuminda pa baby;
• lechi puiro;
• azeta cushina, azeta di salada;
• lechi bleki;
• lechi den paki (tetra) of botter;
• batata;
• boonchi seco y petit pois) incluso en envase  hermetico;
• carni,seco, sala of huma, prepara of conserva den bleki;
• pisca, den bleki of den paki bon seya;
• berdura congela, prepara of conserva den bleki ;
• fruta congela of seco;
• pindakaas;
• medicamento;
• webo di galiña;
• Galiña congela of reg=frigera, henter of den pida;
• Carni baca congela od refrigera den pida chikito of grandi;
• hariña di funchi,maishi grof mula;
• maishi bruto mula, cuminda  mixto pa porco, baca, toro, cabay y pa galiña, pato.
• bruki pa baby ;
• desinfectante pa uzo personal;
• desinfectantes pa cas;
• bebida di electrolito y mineral;
• papel di wc;
• ekipo di proteccion.

Por download e APP ‘Control di Prijs’ di Departamento di Asuntonan Economico riba GOOGLE PLAY pa android devices y APP STORE pa apple devices pa controla prijs di product ora ta bay supermercado.