Control di Polis pa muchanan bao 12 aña cu mester ta sinta patras den auto

E control lo ta den tur bario na unda cu tin scol preparatorio y scol basico. E motibo ta cu Cuerpo Policial a ripara un aumento den accidente cu muchanan menor di edad envolvi, entre otro muchanan bao di 12 aña. Polis tambe a constata cu hopi biaha mayornan y tur esnan cu ta transporta muchanan bao di 12 ana, no ta pone e muchanan sinta patras y/of si nan sinta patras mes, nan no tin e faha di seguridad bisti of nan no ta sinta den un childseat mane ley ta prescribi.

Cuerpo Policial kier a conscientisa tur mayornan, welo, wela y demas personanan cu ta transporta mucha bao di 12 aña den auto, cu e mucha su bienestar ta na prome lugar.

Pa logra esaki e mucha mester tin su faha di seguridad bisti of e mester ta sinta den un childseat (child booster) ariba e sienta patras di e auto.

Conforme nos ley di trafico “ E chauffeur di un vehiculo di motor ta prohibi pa core riba caretera cu un mucha menor di 12 aña sinta dilanti banda di dje” y tambe “ un chauffeur di un vehiculo di motor ta prohibi pa core riba caretera, transportando mucha bao di 12 aña cu no ta sinta patras den e vehiculo cu su faha di seguridad bisti of sea den un childseat (booster) apropia y bon instala.

Polis kier evita cu cualkier mucha por sali herida den un accidente di trafico. Proteccion di e mucha ta conta pa den auto tambe.

Mayornan y como tambe esnan cu ta transporta muchanan bao di 12 aña ta na tempo pa busca y instala un childseat y tambe check si e fahanan di seguridad di e auto ta traha optimalmente.