Consulta di mercado como e siguiente paso den desaroyo di Port City Oranjestad

Na februari 2019, gobierno di Aruba a aproba e  plan di desaroyo urbano pa e proyecto aki, yama apropiadamente Port City Oranjestad. APA lo otorga e prome parcelanan pa construccion na 2020 y p’esey, ta invita e participantenan di mercado pa presenta nan deseo y idea den un consulta di mercado. Cu desaroyo di Port City Oranjestad, APA y gobierno di Aruba tin intencion di trece una transformacion di e area, door di proporciona un combinacion atractivo di bida y trabou cu lo contribui positivamente na desaroyo di Aruba. Port City Oranjestad lo actua como un magneet tanto pa e residentenan como turista, cu un variedad di programa di uzo mixto cu ta inclui hotel boutique, oficina y facilidadnan pa conferencia, apoyo na F&B y tienda, recreacion y vivienda.

E plan di e proyecto di Port City Oranjestad tambe ta inclui un parke publico dilanti di lama entre e terminal di crucero y e beach di Bushiri. Henter e area ta midi 20 hectarea, di cua 12 hectarea  ta destina pa espacio publico y 8 hectarea pa desaroyo di real estate comercial. Ta calcula cu e inversion total ta aproximadamente 575 miyon dolar mericano den e proximo 10 pa 20 aña, cu un inversion estima di aproximadamente 500 miyon di dolar mericano cu ta bin di inversionista priva y desaroyadornan.

APA ta buscando desaroyador y consorcio cu tin experiencia den financiamiento conhunto y desaroyo di parcelanan similar, desde e diseño te su finalisacion y cu tambe ta inclui operacion di esaki. Ademas, APA kier utiliza e consulta di mercado aki para obtene un idea di e rekisitonan y deseonan di e usuarionan final y e operadornan. Meta di esaki ta pa garantisa cu e oferta y demanda ta den ekilibrio ora haci e invitacion formal pa e destaho. Lo otorga y desaroya e parcelanan di e zona den fase. E consulta di mercado ta enfoca mas tanto riba e parcelanan na e parti west, cerca di e beach di Bushiri.

CEO di APA, Marc Figaroa a indica cu meta di e consulta di mercado aki, ta pa APA por haya una idea di e deseonan y ambicion di e operadornan, como tambe di e desaroyadornan di proyecto. Un mihor comprension di e deseonan y ambicion lo permiti apoya  e demanda di e mercado. APA ta haci un yamado na e  desaroyadonan di proyecto, operador di hotel y tur esnan interesa den Port City Oranjestad pa duna APA nan comentario. E desarouyo e area ta enfoca riba sostenibilidad y interes di nos poblacion local, ya cu ta desea di crea un area cu por beneficia Aruba den e proxima decadanan.  

E  plan di desaroyo urbano di Port City Oranjestad ta resultado di un colaboracion estrecho entre APA y Ministerio de Turismo, Salud Publico y Deporte, hunto cu Departamento di Infrastructura y Planificacion (Directie Infrastructuur en Planning, DIP), Departamento di Obra Publico (Dienst Openbare Werken, DOW), Aruba Tourism Authority(ATA), como tambe e Port of Amsterdam International den su rol di consehero.

Pa mas informacion tocante e consulta di mercado y e documentonan relaciona, por bishita: www.arubaports.com/portcityoranjestad