Construccion waf pa container na Barcadera

E proyecto ta ofrece mas cupo di trabou y na final Aruba ta dispone di dos haf grandi, uno na Oranjestad pa barconan crucero y na Barcadera un waf moderno pa solamente container y carga.
E separacion di e dos servicionan ta cumpli cu e necesidad pa brinda un servicio optimal na tanto e negoshi di carga como e sector turistico. Tin tur indicacion cu e ambos industria lo sigui crece den futuro. Pa loke ta e negoshi di carga e haf na Barcadera lo fungi tambe como un haf di traspaso, esta cu for di Aruba mercancia lo wordo manda pa otro paisnan cu no tin haf grandi den barconan mas chikito.
Mudamento di e terminal di carga pa Barcadera ta fortalece e iniciativanan di Gobierno pa establece un pilar economico cu lo haci Aruba un business gateway riba tereno di industria di conocemento, tecnologia y servicio. E sector di energia berde local lo sirbi como catalisador pa tur e iniciativanan cu ta participando den e crecemento economico actual di Latinoamerica segun ministro encarga cu asuntonan economico, comunicacion, energia y medio ambiente Ing. Mike de Meza.