Congreso “Making markets work for consumers and businesses” organisa door di Aruba Fair Trade Authority (AFTA) tabata hopi interesante

E congreso aki tabata bon bishita y a haya un participacion di en total 45 persona.

Tabata tin oradornan local y internacional:

• sr. Albert Scholten (manager di implementacion di AFTA);
• sr. mr. dr. Christof Swaak (abogado na oficina di abogacia Stibbe New York);
• sra. drs. Jeanne Fabian (directora interino di Fair Trade Authority Curaçao).

Durante e congreso aki sr. Scholten a duna un splicacion cortico di e Ley di Competencia di Aruba (Mededingingsverordening) y a menciona e reglanan di e ley aki cu lo drenta na vigor despues di e fase di implementacion. Sr. Swaak a para keto riba e oportunidadnan cu e ley nobo lo crea pa companianan cu ta activo riba e mercado di Aruba. Por ultimo, sra. Fabian a comparti un tiki di e experiencia na Corsou pa loke ta trata introduccion di e ley di competencia di Corsou y ki impacto esaki tabata tin pa comercio y consumidornan.

Despues di e presentacion e oradornan a contesta preguntanan specifico di e publico. Esaki a conduci na discusionnan hopi interesante y fructifero.

Un danki na tur e participantenan y un danki special na e oradornan cu a comparti nan experticio cu tur esnan presente.

Mirando e interes halto den e topico aki, AFTA lo organisa mas evento informativo pa nan stakeholders. AFTA ta invita tur stakeholders cu ta interesa den un sesion informativo pa tuma contacto cu nan via info@afta.aw.

Pa esnan cu no por a presencia e evento aki por wak e grabacion riba e pagina di Facebook di AFTA. Sigui nan riba nan pagina di Facebook ‘Aruba Fair Trade Authority’ pa haya mas informacion tocante e ley di competancia, futuro eventonan y campañanan di conscientisacion.