E meta di e expo aki ta pa brinda un dia informativo na comunidad pa hunto nos reduci y preveni malesanan cronico. Na 2021 estudionan haci a constata cu 16.2% di e comunidad di Aruba a wordo diagnostica cu diabetes, caminda cu e averahe mundial ta na 8%. Consecutivamente, un otro estudio a constata cu 75% di e casonan di dialyse na Aruba por a wordo evita door di hiba un estilo di bida mas saludabel.
Ta prome biaha cu stakeholders ta organisando e expo aki, completamente gratis, cu e meta di conscientisa e pueblo di Aruba tocante un estilo di bida mas saludabel y mas activo. Lo bay tin diferente booth presente e dia aki, di diferente representante den sector di salud, pa ofrece mas informacion posibel. Pueblo por pasa pa ricibi informacion valioso pa cuminsa of continua cu un biba saludabel.
Tin hopi enfermedad cu por wordo preveni door di tuma stapnan chikito. Come berdura y fruta ta un ehempel di esaki. Tambe haci actividadnan fisico manera cana of core 30 minuut pa dia tin beneficionan positivo pa un persona su salud.
Minister Dangui Oduber invita pueblo di Aruba pa bishita e expo. Pronto lo sigui mas informacion en cuanto e horario y localidad.
Share this page