Conferencia tocante adiccion (gearchiveerd)

Segun Ministro di Salubridad Publico dr. Richard Visser, adiccion no ta un problema di husticia of di tereno social, pero cu mester yuda e persona cu adiccion pa rehabilita y tambe pa e haya su cuido despues pa e por forma parti di nos sociedad.
Durante e conferencia a trata dos problema di adiccion esta uzo di alcohol y droga.
Meta di e conferencia cu a conta cu participacion di como 340 persona, tabata pa yuda tur esunnan cu ta traha diariamente dia cu problema di adiccion, esta pa yuda nan con pa atende cu diferente tipo di adiccion. Pa medio di Fundacion Maneho di Adiccion Aruba, ministro di Salubridad Publico kier logra pa na un edad hoben, cuminsa duna informacion pa traha riba tereno di prevencion y alabes envolvi e mayornan den e proceso.
Segun Sylvester Aboikini di Novadic Kentron na Hulanda, mester traha a base di un cuido integral, esta cu un persona por yega bati na porta di cualkier instancia y sea e ta haya ayudo of ta referi e persona na un instancia cu realmente por yud’e. Esaki ta e base pa un bon maneho di adiccion segun Sr. Aboikini.
Na final di e conferencia a palabra cu lo acerca ministerio di Enseñansa pa introduccion di programanan specifico den enseñansa cu lo yuda e hobennan pa ta mas fuerte y resistente contra e tentacion pa uzo di alcohol y droga.
Den cuadro di e conferencia tin un exposicion di obranan di arte di 24 artista local. Pero na mesun momento e obranan ta forma parti di un “auction”, esta un persona por haci un oferta riba un obra pa e por cumpr’e. E exposicion ta habri den West In Hotel te cu dia 10 di october proximo.
Recaudacion di e benta ta pa un bus cu ta bay den tur bario pa duna informacion y tambe duna cuido ambulante na personanan cu adiccion.