Mehoracion di e clima impresarial y di inversion na Aruba ta un prioridad. E vision di gobierno ta un clima di inversion dinamico y stimula economia. Den transcurso di añanan, implementacion di consehonan y accionnan treci dilianti door di expertonan local y internacional pa mehoracion di e clima empresarial y inversion, no a avansa.
Reformanan economico cu meta di realisa un economia dinamico y resiliente ta parti di e Landspakket. Punto E.6 ta dirigi pa mehora di clima empresarial y di inversion na Aruba. Den e cuadro aki, Economisch Bureau Amsterdam a haci un investigacion independiente y a duna varios recomendacion. E diferente rapportnan existente, como tambe consultanan cu stakeholders a forma e base di e investigacion di Economisch Bureau Amsterdam.
Recientemente, riba 14 februari, Minister di Asunto Economico, Comunicacion y Desaroyo Sostenibel, mr. Geoffrey Wever a tene un presentacion pa Parlamento riba e progreso di punto E.6 di Landspakket y e trayectoria di implementacion di e programa “Reformanan clima empresarial y di inversion Aruba”. Siguientemente, riba 15 februari, Minister Wever a anuncia e publicacion di e rapport “Ondernemings- en investeringsklimaat Aruba”.
A recomenda cuater proyecto di prioridad cual lo nifica un mehoracion substancial pa e clima empresarial y di inversion:
- Aceleracion y mehoracion di proceso di permiso;
- One-stop-shop digital;
- Implementacion di Aruba Fair Trade Authority;
- Habri cuenta di banco di manera eficiente.
E proyectonan aki a haya prioridad pa traha na e precondicionnan necesario pa desaroyo economico. Banda di e proyectonan aki, tin otro trayectonan ta cana simultaneamente pa stimula diferente sector, mercadea Aruba riba panorama internacional, crea incentivanan pa stimula economia y mantene e dialogo cu posibel inversionistanan. Minister Geoffrey Wever: “E cuater proyectonan aki ta crea e condicionnan necesario pa avansa desaroyo economico di nos Aruba”. Un vision comparti y colaboracion ta necesario pa logra resultadonan concreto.
Share this page