Con ta deshaci di “desperdicio di construccion”?

ORANJESTAD – Ministerio di Transporte, Integridad, Naturalesa y Asunto di Adulto Mayor ta informa tocante con pa deshaci di “desperdicio di construccion.

Kico ta desperdicio di construccion? 

Desperdicio di Construccion ta desperdicio cu ta  acumula for di sitio di construccion of demolicion. Ehempelnan di esaki ta entre otro: cement / beton, bloki, tegel, panchi, piedra, santo, porta of bentana, palo, diferente tipo di metal, toilets, plastic, papel, etc. Por procesa cada tipo di desperdicio na un forma responsabel y esaki ta locual cu nos kier motiva pa eherce. Si ta un sitio di demolicion, e prome stap ta pa constata si tin asbest presente. Si ta asina, por aserca ATCO prome cu cuminsa cu e trabou di demolicion.  

Con por entrega desperdicio di construccion den bulto? 

Si a constata cu no tin asbest presente, companianan por scoge pa continua na entrega nan desperdicio di construccion den un forma mixto combina. Esaki ta nifica cu no ta separa pa categoria di sushi for di e sitio di construction of demolicion. Desperdicio di construccion combina sin asbestos por entrega na  Ecotech Freezone . Esaki tin su consecuencia cu tin un diferencia di prijs pa cada ton cu  entrega. 

Con pa separa desperdicio di construccion? 

Desperdicio di construccionCompanianan cu ta scoge pa spaar placa y separa e desperdicio di construccion of demolicion por haci esaki na e siguiente forma:  

  • Cement, bloki di cement,  kalichi, santo, pavers, klinkers y basecourse por entrega GRATIS na Apex pa e por procesa esaki.  
  • Desperdicio di metal por entrega na Daltra NV of na ICR Services y ta ricibi placa pa entrega esaki. 
  • Desperdicio organico di mata, palo of pallet blanco por entrega na Johnsons of Ecotech Freezone.  
  • Tur otro desperdicio cu no ta reciclabel manera wc kibra, tegels, saco di cement por entrega den bulto na Ecotech Freezone cu tin un gasto 

E benificio di separa e tipo di desperdicio aki ta cu como compania cu ta entrega esaki por spaar placa ora di hiba paso e desperidico ta considera “limpi”. Unabes cu e desperidicio ta combina y no separa e labor pa por procesa esaki debidamente ta bira mas intensivo y esaki ta resulta den un prijs mas halto.  

Pa mas informacion tocante desperdicio di construccion por bishita website www.trashtocash.org pa asina haya un bista di e Blue Print pa maneho di desperdicio.  

E cambio aki ta no grandi, pero como ciudadano di e pais aki nos tin cu cuminsa cambia nos manera di anda y maneha nos mesun desperdicio. E cambio aki tin e meta principal pa nos atende cu nos problemanan cu a bin ta crece durante 70 aña y cu a causa hopi daño na nos medio ambiente. E ta un paso den e bon direccion pa asina sigura cu nos yiunan tin un futuro caminda nan por disfruta di un medio ambiente sano y cu nan ta orguyoso cu pais Aruba ta cumpli cu leynan internacional pa cu maneho responabel di desperdicio.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options