Compara cu 2019 Aeropuerto di Aruba a recupera 65% di e cantidad di pasaheronan cu a sali for di Aruba durante april y mei 2021

ORANJESTAD – Aruba Airport Authority N.V. (AAA) ta raporta riba e prestacion di Aeropuerto di Aruba pa e lunanan april y mei 2021; dos luna excepcional desde e inicio di e pandemia na maart 2020.

April y mei 2021 vs 2019 - Total di pasahero cu ta genera entrada  (Total revenue generating pax - RGPs).Na april y mei 2021, Aeropuerto di Aruba a procesa respectivamente 65,651 y 70,452 pasahero cu a sali for di Aruba. April a conoce 40% mas pasahero compara cu maart y mei a conose 7% mas pasahero compara cu April. Durante e ultimo 2 lunanan Aeropuerto di Aruba a recupera 65% di e cantidad di pasahero cu a procesa durante e mesun lunanan na 2019. Den e lunanan april y mei 2021, 120,320 pasahero a biaha pa Merca, 7,131 a biaha pa Europa, 2,468 a biaha pa Antiyas Hulandes y 6,184 pasahero a biaha pa Latino America. E cantidad total di pasahero cu a sali for di Aruba durante april y mei ta 69% mas hopi di loke a premira pa e periodo aki.

Fluho di pasahero 2019 - 2021Un averahe di load factor di pasaheronan cu ta sali for di Aruba (PLF) (cantidad di asiento ocupa na momento cu avion sali for di Aeropuerto di Aruba) pa e mercado Mericano di 71% (*) a raporta durante e lunanan di april y mei 2021, mientras cu e PLF averahe pa tur mercado tabata 68% durante e mesun temporada (en comparacion cu 2019 unda a alcansa e PLF averahe di 85%).

(*Excluyendo “de-densification” di avion pa april – desde mei aerolineanan no ta blokeando asiento mas abordo di avion)

Durante e ultimo 2 lunanan, Aeropuerto di Aruba a atende un averahe di 23 vuelo pa dia, bahando di 35 vuelo pa dia durante e mesun temporada na 2019. Durante e mesun periodo na 2020 Aeropuerto di Aruba a atende solamente 27 vuelo ora cu frontera tabata cera pa operacionnan comercial.

Basa riba e ultimo informacion ricibi, Aeropuerto di Aruba awo ta spera di recupera 60% di trafico pa 2021 en comparacion cu 2019 door di yega aproximadamente 760K pasahero cu lo sali for di Aruba. Esaki lo nifica un aumento di 77% compara cu 2020 unda cu a procesa un total di 430K pasahero cu a sali for di Aruba.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options