Companianan por aplica pa sosten financiero den forma di Subsidio di Salario

Dit item is gearchiveerd op 11-06-2020.

ORANJESTAD - Siman pasa SVB a manda un email na tur compania cu ta bin na remarke pa e sosten financiero den forma di subsidio di salario.

Kico ta Subsidio di Salario?

Subsidio di Salario ta un sosten financiero pa empresanan local cu a consecuencia di e situacion actual causa pa e pandemia COVID-19 ta sufri un perdida di entrada di benta di por lo menos 25%. Meta principal di e programa di Subsidio di Salario ta pa mantene mas trahado cu ta posibel den servicio aunke tin menos (of no tin) actividad economico y pa garantisa pago parcial di salario.

Ken ta bin na remarke?

E companianan afecta pa COVID 19 ta ricibi un email di SVb cu e informacion necesario con pa aplica pa e yudansa financiero di sosten di salario. No ta tur dunado di trabou ta bin na remarke pa ricibi Subsidio di Salario. Tin un lista di rekisito cu e dunado di trabou mester cumpli cune. Algun rekisito ta cu e compania mester premira un perdida di entrada di benta pa su compania di por lo menos 25%. E compania mester ta registra na SVb y na Departamento di Impuesto y ta sigui cumpli cu e pagonan di impuesto y primanan social. E Subsidio di Salario cu e dunado di trabou ta  ricibi mester wordo uza pa paga salario di su trahadonan y e primanan social cu dunado di trabou mester paga.

Ki tempo ta paga?

Lo paga e Subsidio di Salario mensualmente y tur luna e dunado di trabou mester bolbe aplica pa esaki uzando e portal di MiSVb riba www.svbaruba.org. Pa facilita e dunado di trabou y brinda e ayudo mas lihe posibel e Subsidio di Salario ta wordo paga den forma di un adelanto (na Hulandes un voorschot) a base di e perdida di entrada di benta premira pa e dunado di trabou. Despues lo controla y fiha e suma di subsidio a base di entrada real di e dunado di trabou den e lunanan cu e dunado di trabou a ricibi e adelanto di e Subsidio di Salario.

Subsidio di Salario ta mescos cu FASE?

Subsidio di Salario no ta mescos cu FASE y tampoco e Sosten Financiero pa Empresa Chikito y Mediano. Ta trata aki di tres programa di sosten financiero diferente cada un cu su meta y grupo meta.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options