Citgo a indica cu lo kier bay pa 31 di januari 2020

Dit item is gearchiveerd op 29-02-2020.

ORANJESTAD - Durante un conferencia di prensa riba dialuna 27 di januari 2020,  Prome Minister Evelyn Wever-Croes a duna un relato amplio riba e ultimo desaroyonan tocante Citgo.

E situacion ta tenso y Citgo mes a indica cu nan lo desea di bay pa 31 di januari 2020. E siman aki lo ta un siman determinante pa logra esaki of no. Mientras tanto, negosacion ta andando ainda pa asina Aruba haya bek e ‘yabi’ di e refineria y pa Citgo no bay cu e ‘yabi’ y tene Gobierno den corte pa hopi aña.

Prome Minister a enfatisa cu e motibo pa cua ta importante pa yega na un areglo di terminacion di contract cu Citgo ta pa asina Gobierno por haya e oportunidad pa drenta y drecha caminda cu mester drecha. E ekiponan den e refineria ta den mal condicion y hasta tin ta den cay den otro. E waf tambe a mustra señalnan di hopi mal condicion.  

Prome Minister Evelyn Wever-Croes durante conferencia di prensa riba 27 di januari 2020.

Prome Minister a duna di conoce cu lo ta miho pa Citgo bandona Aruba pa asina Gobierno por busca un otro operador. Mientras tanto e compania estatal, Refineria di Aruba (RDA), a cuminsa prepara pa e momento cu Citgo bay. E opcionnan cu tin ta, cu si Citgo bay e fin di luna aki, ya dia prome di februari mester tin ekipo eynan pa sigui cu e trabounan di e terminal, ya cu na februari un otro barco lo drenta cu gasolin, fuel y heavy fuel oil (HFO) y asina garantisa e suministro. Contrario na e rumornan di fin di siman na unda a conseha tur hende pa bay tank nan auto pasobra gasolin lo caba na Aruba, Prome Minister ta enfatisa cu e suministro local niun momento tawata na riesgo y lo no ta na riesgo tampoco pasobra Gobierno tin un Plan B.

Plan B, segun Prome Minister ta encera e compania Terminal di Energia Aruba,  cu RDA a lanta pa opera e terminal y tuma over e trabounan.  E compania aki ta un compania estatal cu ta cay bou di RDA y RDA ta cay bou di Gobierno. Pa motibo di e menasanan di Citgo di lo bay un ora pa otro, e compania aki mester a bin pa sigui cu e trabounan specialmente pa loke ta trata suministro di gasolin, Heavy Fuel Oil (HFO) pa WEB y jetfuel.

Pa loke ta trata e trahadonan, Prome Minister a referi na e reunionnan cu ta tumando luga na unda cu tin mediador di Gobierno den e negosacionnan. E compromiso di Gobierno ta pa percura pa pronto haya un operador nobo cu lo tuma nan over. Algun Terminal di Energia Aruba lo tuma den servicio pa garantisa cu e trabounan na e waf ta continua ora cu e barco yega na februari.

Pa loke ta trata suminstro di gasolin, Prome Minister ta enfatisa cu e rumornan no ta berdad y ta pidi pa pueblo no cay den panico. Aruba ta den e ultimo pa loke ta trata e capitulo yama Citgo cu a tarda masha hopi mes pa finalisa.  Ya desde mei aña pasa Prome Minister a informa cu e lo institui un comision pa nan bay busca un otro operador of studia kico otro lo por haci cu e refinería. Despues di tanto luna ainda no por a ni institui e comision aki, pero denter di poco lo institui e comision aki mirando e ultimo desaroyonan. Mientras tanto, Prome Minister ta pidi Aruba pa no cay den panico. Gobierno ta manehando e situacion cu diferente plan riba mesa pa garantisa  specialmente suministro di gasolin.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options