Cifranan di 2020 y 2021 di Centro di Control di Cacho (CCC)

A inaugura CCC na juli 2020 como un luga cu ta maneha y unda autoridad por pone cachonan “in bewaring” manera cu Ley di Cacho ta prescribi. Tambe como luga pa yuda controla e populacion di cacho door cu hendenan por keda trece nan mascotanan indesea of cachonan cu ta parce di no tin un doño. Alabes na CCC por haya informacion tocante cuido di cacho en general, of con pa preveni reproduccion indesea.

Cifranan di 2020 ta indica cu durante e lunanan di juli, augustus, september, october, november y december, 221 cacho a trece na e sitio, di cual a adopta 117 y a  pone drumi 104. Esaki ta igual na un porcentahe di adoptacion y euthansia di respectivamente 53% y 47%. E cifranan aki a ser publica den comienso di 2021.

Pa aña 2021 e cifranan ta mustra un total di 562 cacho cu a trece na CCC, di cual 12 (2%) nan doño a busca bek y 331 a adopta (59%). Pues un porcentahe di euthanasia di 39% pa 2021.

Apesar di ta un centro pa cacho so, tambe ta trece pushinan indesea na e sitio. Pa loke ta trata pushi, durante 2021 a trece un total di 549 pushi, di cual 161 un fundacion a  tuma. Den 2020 un total di 246 pushi a ser treci, di cual 25 pushi a wordo scapa.

E realidad ta cu e cantidad di cacho y pushi cu ta trece ainda ta tiki compara cu locual tabata trece na e mesun sitio aki den e añanan anterior tempo cu e hoki di Veterinaire Dienst no tabata uno maneha. E tempo ey e cantidad pa aña di cacho y pushi cu tabata trece tabata semper den miles. E porcentahe di euthanasia e tempo ey tabata 98% tambe; pues Gobierno di Aruba ta hopi contento cu e gran avance cu CCC ta nifica pa nos comunidad y pa nos bestianan.

Alabes mester menciona cu e hecho cu a brinda tanto cacho y pushi un di dos oportunidad pa un bida digno. Esaki no por logra sin e colaboracion di varios fundacion. Apenas 5% di e cachonan adopta na 2021 a bay na un hogar cu no ta afilia na un fundacion, pues 95% di e cachonan y 100% di e pushinan a wordo tuma door di un fundacion cu na su turno tin caba of lo busca un hogar nobo pa nan.

E imagen aki bao ta ilustra e cifranan entre e fundacionnan den 2021.

Concluyendo por ser bisa cu e derecho di existencia y balor agrega di CCC como tambe e tremendo trabao y cooperacion cu fundacionnan ta ser considera como exitoso . Banda di e exitonan, e retonan tambe mester ser ilustra y identifica. E retonan existente por ser califica den corto:

1. Un grado hopi abao di adopcion;
2. Un falta di conocemento y cumplimento cu e Ley di Cacho;
3. Un grado halto di doñonan di mascota cu no ta asumi nan responsabilidad y e falta di educacion den esaki;
4. Un division entre stakeholders pa motibo di diferente vision riba e solucion pa e problematica. Esaki den corto por ser descirbi como un diferencia entre un pensamento di Trap, Neuter & Release (TNR) y un pensamento cu ta tene cuenta cu e leynan existente y e problematica di cachonan riba caya;
5. Un cantidad halto di abandono di nos mascotanan, y cu esaki ta incluyendo e abandono di mascotanan cu ta sosode na CCC fuera di e orarionan di operacion;
6. Un grado abao di mascotanan cu no ta sterlisa y/of cu tin microchip.

E ‘National Plan for Stray Animals’ ta un plan intregal cu ta atendiendo cu entre otro e retonan menciona. Den esaki ta hopi importante pa Gobierno hunto cu fundacionnan enfoka riba locual nan tin den comun y riba posibel solucionan. Cooperacion, stimula adopcion, sterilisacion di nos mascotanan tanto cacho y pushi, como tambe un actitud positivo den comunidad, ta puntonan clave pa nos por logra nos metanan.

Pa mas informacion y pa keda na altura di e ultimo desaroyonan por sigi e paginanan di FaceBook di CCC y Stima Mi Mascota. Orario di servicio di CCC ta di dialuna pa diabierna di 8am pa 11.30 am.