Despues cu aña pasa a introduci e “Exit Strategy”, gobierno a dicidi pa pone 2019 como e aña di referencia mirando cu 2019 tabata un aña record den turismo.
Crecemento den Turismo Stayover vs 2019
Den e prome 4 luna di 2023 tur luna a conoce un recuperacion di mas di 100%.
Durante e prome 4 luna Aruba a ricibi 415,648 turista “stayover” cu ta un recuperacion di 7.2% compara cu 2019. Den luna di januari y februari a recupera cu 105%, na luna di maart 102% y na april 116%.
E mercado Mericano ta keda esun mas importante pa Aruba y den luna di januari esaki a recupera cu 113%, na februari 108%, na maart 102% y na april 120%.
E mercado cu mas a sobresali y cu mas a recupera den porcentahe ta e mercado di Colombia y esaki ta debi den e aumento di e “airlift”, cantidad di stul di y pa Colombia. E recuperacion den e prome 4 luna di 2023 ta lo siguiente: januari 104% - februari 159% - maart 145% y april 130%.
Crecemento di e Average Daily Rate (ADR) vs 2019
E averahe di e ADR den e prome 4 luna di 2023 ta $393,59 pa camber mientras cu na 2019 esaki tabata $334,67. E ADR di 2022 di e mesun temporada ta constata un crecemento di 13.9% di e ADR. Ta prome biaha cu e ADR ta yega den careda di $400.
Crecemento di e Revenue Per Available Room (RevPAR) vs 2019
E RevPAR ta indica e calidad di turista cu ta keda na hotel. E averahe di e RevPAR di e prome 4 luna di 2023 ta $324,48 mientras cu na 2019 esaki tabata $295,72. Compara cu e RevPAR di 2022 por constata un crecemento di 40.7%.
Crecemento Turismo Crucero vs 2019
Turismo crucero su recuperacion a tarda un poco pero tambe a crece compara cu 2019. Den e prome 4 luna di 2023 Aruba a ricibi 425.620 turista crucero. Esaki ta 70.185 turista crucero mas cu na 2019 y ta un recuperacion di 19.7%.
E cantidad di crucero cu a yega nos isla tambe a aumenta. Den e prome 4 luna nos a ricibi un 165 crucero, na 2019 esaki tabata 143. E aña aki te cu april nos a ricibi 22 crucero mas cu na 2019 y esaki ta crecemento di 15.4%. Gobierno ta premira cu 2023 lo bira un aña record pa turismo crucero.
Aumento den e Tourism Credit vs 2019
E Tourism Credit ta indica cuanto placa turismo ta laga den nos economia segun data di Banco Central. Den 2022 maske cu nos no tabata tin un recuperacion di 100% di nos turismo tog e Tourism Credit a surpasa e cifra di 2019.
Den 2022 turismo a laga alrededor di 4.4 biyon florin den Aruba su economia mientras cu na 2019 esaki tabata alrededor di 3.7 biyon florin. Esaki ta un crecemento di 118%
Mirando e indicadornan manera e RevPAR, ADR y otro indicador como tambe proyeccion, ta premira cu den 2023 turismo lo surpasa e cifra di 2022. Segun encuesta cu a haci, Aruba ta score 9.1 (di 1 pa 10), pa loke ta trata satisfaccion di e turista.
Gobierno ta gradici ATA, AAA, APA, AHATA, ATSA, TPEF, Aruba Vacation Rental Association y tur esnan cu ta traha cu alma y cuerpo den sector turistico pa nan esfuerso y dedicacion.
Share this page