Certificado di vacunacion Europeo ta valido pa 9 luna

E motibo pakico ta introduci cambio den duracion di validez di e certificado DCC ta relaciona cu reduccion den efectividad di e vacuna, cu tempo. Esaki nifica cu desde luna di februari di aña 2022 e validez di e certificado di vacunacion Europeo ta caduca 9 luna despues cu e persona ricibi su ultimo vacuna di e serie basico.

Cu serie basico ta referi na e prome y di dos dosis di e vacuna di Pfizer of na e 1 dosis di e vacuna Johnson & Johnson.   

Pa esunnan cu a ricibi e prome y di dos dosis cu e vacuna di Pfizer of 1 solo biaha e vacuna di Johnson & Johnson (Janssen) y no a haña e booster shot ainda, lo haya nan mes confronta cu varios pais Europeo lo no acepta e certificado di vacunacion di e serie basico mas. E validez di e certificado di vacunacion DCC por afecta no solamente e posibilidad pa drenta un pais, pero tambe pa haci uzo di diferente servicionan manera entre otro den horeca y eventonan cultural. Pa esunnan cu a haya e booster, e validez di e certificado di vacunacion DCC lo wordo extende cu 9 luna despues di e booster-shot.

DVG ta sigui recomenda tur persona di 18 aña bay ariba pa tuma e booster shot mas pronto posibel, cu ta 3 luna despues di e di dos vacuna di Prifzer of 3 luna despues di e vacuna di Johnson & Johnson. E booster shot ta precura pa e persona tin un miho proteccion contra e variante di Omikron y ta preveni hospitalisacion door di percura pa tin un cantidad grandi di anticurpa como resultado di un boostershot recien.

Persona cu a haya un infeccion di COVID19 recien, mester warda 3 luna despues di a test positivo pa tuma e booster shot. 

DVG ta recomenda tur biahero pa prome cu biaha, tuma bon nota di e reglanan cu ta regarda vacunacion y testing di e pais di destinacion. Cada pais ta dicidi su mesun reglanan pa cual motibo reglanan pa drenta cada pais por ta diferente.