Censo2020 ta cuminsa 1 di october 2020

ORANJESTAD - Oficina Central di Estadistica kier a informa e pueblo di Aruba Censo2020 ta cuminsa 1 di october proximo.

Sun Plaza – Edificio unda Oficina di Estadistica ta ubica na di tres pisoManera ta conoci, un Censo ta un conteo general di poblacion y vivienda. Den otro palabra, durante e Censo nos ta conta tur persona cu, riba 1 di october, ta bibando na Aruba pa 1 aña of mas of tin e intencion di biba na Aruba pa 1 aña of mas.

Actualmente Aruba ta pasando door di un temporada dificil, pero net den e momentonan aki e ta di sumo importancia pa colecta e datonan di e situacion real di e hogarnan na Aruba. CBS kier a pidi tur hogar pa coopera cu Censo 2020.

Censo2020 ta consisti di 2 parti:

  • Di 1 pa 10 di oktober 2020: Conteo Online;
  • di 1 pa 26 di november 2020: Conteo di hogarnan cu no a participa den e Conteo Online.

E hogarnan por haya acceso na e cuestionario online door di bishita e website di Censo2020  www.census2020.aw y uza nan number di percela di WEB NV.

Mester tene debido cuenta cu mester finalisa e cuestionario di Censo den 1 solo biaha. E number di percela di cada hogar tambe por uza solamente 1 biaha. Riba e website por lesa e cuestionario di Censo2020 pa asina un y tur ta na altura di e preguntanan y pa por prepara esakinan prome cu yena e cuestionario online. Esaki lo facilita e yenamento di e cuestionario. Asina cu e website di Censo2020 ta activo nos lo anuncia esaki oficialmente.

Logo CENSO Aruba 2020E hogarnan cu no tin un number di percela di WEB por yama CBS pa haya un codigo individual pa haya acceso na e cuestionario. Personal di CBS lo ta disponibel via whatsapp of telefon via number 524 7444. E number aki lo ta activo entrante 1 di october. Tambe por manda nos un e-mail na census2020@cbs.aw pa yuda esnan cu ta yena e cuestionario online. E e-mail aki ta activo caba.

Si actualmente tin cualkier pregunta por yama e number central di CBS 583 7433.Asina cu nos habri e “Census Help Desk” lo por tuma contacto cu nos na 524 7444 pa asina nos por brinda e comunidad di Aruba e ayudo necesario pa yena e cuestionario di Censo online.

CBS kier uza e oportunidad aki pa encurasha tur hogar na Aruba pa coopera cu Censo2020 y yena e cuestionario di Censo online.

Pasobra Aruba ta conta riba BO!

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options