Esaki en conexion cu preparacionnan pa cu e Conteo General di Poblacion y Vivienda (Censo Aruba 2020) cu lo tuma lugar entre 1 di october te cu 10 di oktober 2020.
Manera ta conoci Censo 2020 lo ta completamente digital. Compara cu e Censonan anterior, esaki kiermen cu lo tin cambio organisatorio importante. Pa motibo aki un Censo Piloto ta di sumo importancia.
Durante e Censo Piloto lo test e aspectonan di digitalisacion di Censo 2020, por ehempel:
- e cuestionario digital;
- e proceduranan digital cu lo uza durante e periodo di conteo pa garantisa e calidad di e datonan colecta;
- e procesonan digital pa analisa e datonan obteni;
- e metodonan digital cu lo uza pa procesa e datonan y publica e informacion colecta.
Mescos cu pa Censo2020, durante e Censo Piloto lo parti Aruba den 5 area:
- San Nicolas;
- Santa Cruz;
- Paradera;
- Oranjestad;
- Noord.
Lo acerca un total di 750 punto di adres den cada area.
Pa e Censo Piloto, un total di 75 persona lo fungi como encuestador y 15 como encuestador di reserva. Nan lo acerca un total di 4700 punto di adres. Un encuestador di CBS semper por indentifica su mes cu un badge cu e logo di Censo 2020 y e logo di CBS. E hogarnan cu lo acerca lo entrevista nan pa medio di un cuestionario digital riba un tablet. E topiconan cu ta inclui den e cuestionario ta relata na e vivienda, e hogar y e personanan den e hogar.
CBS kier a enfatisa cu e privacidad di cada persona ta garantisa pa ley (Statistiekverordening) durante e Censo Piloto como tambe e Censo 2020. Ta uza e informacion colecta solamente pa produci estadisticanan agrega for di cual no por identifica un persona of instancia.
Tambe ta importante pa corda e comunidad di Aruba cu hogarnan escogi pa e Censo Piloto lo conta nan tambe na Censo 2020. CBS ta depende grandemente riba e cooperacion di hogarnan na Aruba pa haci e Censo Piloto y e Censo 2020 un exito. P’esey e lema di e Censo ta: “Pasobra Aruba ta conta riba BO!
Si tin cualkier pregunta por haci esaki libremente na telefoon 524-7433 of via nos e-mail adresnan: cbs@setarnet.aw of census2020@cbs.aw.
Share this page