Censo 2020 ta den pleno preparacion

Di 3 pa 13 di october CBS lo haci un prueba unda lo acerca algun hogar pa asina haci un Censo piloto pa sigura cu tur cos ta funciona debidamente y Censo 2020 por ta exitoso.

E meta di e censo ta pa nos por haya informacion di cuanto nos ta, ken nos ta y con nos ta biba na Aruba.

Full digital y lo midi sostenibilidad:

Pa promer biaha e Censo lo ta completamente digital danki na Setar NV cu a yuda cu e tablets necesario pa haci e encuesta. Lo monitor y procesa tur informacion den tempo real. Censo 2020 lo tene cuenta tambe cu tur  meta di sostenibilidad di Nacionnan Uni cu ta trata persona y su hogar. Ta trata aki di meta nr. 1 te cu 11, menos nr. 2. Di e manera aki por haya un bista tambe con duradero Aruba ta desaroyando su mes.

Ban coopera pa un Censo 2020 exitoso:

Pa Censo 2020 por ta exitoso e participacion di pueblo ta importante. Pesey e apelacion ta pa nos tur por coopera na momento y brinda nan e informacion necesario ora e encuestadornan cu  acerca nos. E encuesta ta tuma mey ora y e encuestadornan ta debidamente prepara pa e trabou. E cooperacion di nos tur ta importante, pasobra Aruba ta conta riba bo.