En coneccion cu esaki, lo tuma luga diaranson, 15 di maart pa 6’or di atardi na Fort Zoutman, un competencia di Poeta di Patria (Volksdichter), cu e tema “Grandesa di bo Pueblo, ta su gran cordialidad”. Muchanan di scol por tuma parti den e competencia di pinta, cual tema lo ta Nos Himno.
E tradicional Festival di Canto lo tuma luga e aña aki riba Plasa Betico Croes. Muchanan y hobennan por participa cu un composicion original na Papiamento riba 10 y 11 di maart pa 7’or di anochi. Festival pa adultonan ta riba 12 di maart proximo pa 7’or di anochi.
Riba diahuebs 16 di maart pa 7’or di anochi lo bay tin un ceremonia riba Plasa Monumento 18 di Maart na memoria di homber nan cu pa prome biaha na 1948 a firma un peticion pa e autonomia di Aruba.
Diabierna 17 di maart lo tuma luga develo/inauguracion di e estatua di e tan stima pianista, cantante, poeta, compositor, escritor y pintor Sr. Padu Lampe (Juan Chabay Lampe). Hunto cu Rufo Wever y Hubert (Lio) Booi, Padu a skirbi (compone) e wals “Aruba Dushi Tera” cu na 1976 a bira e himno oficial di Aruba. Despues di e develo/inauguracion lo sigui un manifestacion cultural riba Plasa Padu, Juan Chabay Lampe cu ta hiba su nomber (net patras di oficina di Gobierno).Riba e plasa lo bay pone diferente tent pa bende cuminda crioyo, snacks, obra di man, buki etc.
Musiconan Arubano, grupo nan di baile y e pianista Argentino Sr. Raul di Blasio lo duna un presentacion completo di nan propio composicionnan. E actividad ta cuminsa 7’or di anochi.
Riba e dia oficial, diasabra 18 di maart lo pone krans na e monumentonan Plasa Henny Eman pa 8’or di mainta, Plasa Monumento 18 di maart pa 8:10 di mainta, Plasa Juancho Irausquin pa 8:20 di mainta y Plasa Betico Croes pa 8:30 di mainta. Despues lo sigui cu un programa protocolario pa 9’or di mainta. E ceremonia dia 18 di maart lo bay hunto cu e hisamento di bandera Arubano y e canto di e himno den presencia di autoridadnan local. Manera ta custumber riba Vondellaan, diferente gruponan uniforma lo participa na e desfile.
Despues lo bay tin diferente actividadnan cultural, deportivo y social den tur districto di Aruba.
Share this page