En conexion cu e celebracion aki, Comision Celebracion Dianan Nacional (CCDN) ta preparando un programa tanto protocolar como un manifestacion cultural cu tur e mandatario y invitadonan, cu lo tuma luga riba diabierna, 25 di januari venidero.
E ceremonia protocolar lo cuminsa pa 9’or di mainta y e manifestacion cultural lo cuminsa pa 6’or y mey di atardi riba Plaza Libertador Betico Croes riba Vondellaan.
Despues di e ceremonia protocolar di mainta lo sigui riba atardi mes cu e manifestacion cultural cu diferente artista local te 10’or y mey di anochi.
Pa haci e anochi aki uno ameno, lo bay tin diferente tent cu tanto artesania, cuminda crioyo, juice fresco, awa di coco, flor, mata, buki, remedi tera, raspau y hopi mas. Tambe lo tin un Kids Corner pa deleita nos muchanan cu entre otro Dino-Jump. Bar y cushina lo ta bon surti.
Comision CCDN ta informa na tur esnan cu ainda ta desea un tent pa bende producto ariba menciona, por pasa personalmente na Departamento di Cultura Aruba cerca sra. Marlene Lampe of yama na 582-2185.
Pa tur actividadnan rond di nos isla ta ser pidi pa organisadornan manda nan informacion via e-mail na info@cultura.aw pa sr. Stan Dabian p’asina traha e calendario di actividad pa nos pueblo di Aruba por bishita tur actividad riba Dia di Betico.
For di awor caba comision CCDN bou auspicio di Departamento di Cultura Aruba y Ministerio di Finansa, Asuntonan Economico y Cultura ta spera boso hunto cu famia pa bin celebra e bunita dia aki na Plaza Libertador G.F. Betico Croes. Celebra hunto nos Dia d Betico.
Share this page