CBS ta anuncia start di e Encuesta di Forsa Laboral november 2022

ORANJESTAD - Riba 14 di november 2022, Oficina Central di Estadistica (CBS), conhuntamente cu Departamento di Labor y Investigacion (DAO) a cuminsa e Encuesta di Forsa Laboral november 2022 (EFL november 2022).

E encuesta aki tin como meta pa forma un imagen actual y completo di e mercado laboral di Aruba. Pa medio di e informacion compila lo determina, entre otro, e cifra di empleo y desempleo na Aruba. E informacion aki, den conhunto cu e datonan colecta durante di e añanan anterior, ta uza pa señala e tendencianan riba nos mercado laboral. Alabes ta yuda gobernantenan y empresarionan refina y mehora nan maneho pa cu e mercado laboral di Aruba.

Oficina Central di Estadistica (CBS)Ta conduci e EFL november 2022 digitalmente y telefonicamente. Lo  acerca e hogarnan cu a participa na Censo 2020 y na e EFL juni 2022 pa participa na e EFL november 2022. E hogarnan aki lo ricibi sea un yamada pa haci un entrevista of un e-mail cu lo contene mas informacion di e encuesta como tambe un link pa por yena e cuestionario online.

E cuestionario ta contene preguntanan basico pa tur persona den e hogar, pero preguntanan relata na e mercado laboral ta  puntra solamente  esnan di 15 aña bay ariba ya cu segun e principionan di  Organisacion Internacional di Labor (ILO) ta considera personanan 15 aña bay ariba como parti di e forsa laboral di un pais.

Mester enfatisa cu e ta sumamente importante pa tur persona di 15 aña of mas cu wordo acerca pa yena e cuestionario di e EFL november 2022 pa medio di un e-mail of via telefon, coopera pa yena e cuestionario completo.

Encuesta di Forsa Laboral november 2022Durante e periodo di ehecucion di e  EFL November 2022 lo tin un team disponibel na CBS pa contesta cualkier pregunta of inquietud via telefon of e-mail y pa asisti cu e yenamento di e cuestionario online.

E team ta disponibel di dialuna pa diabierna for di 8:00am pa 12:00pm y di 2:00pm pa 8:00pm, y tambe den weekend for di 12:00pm pa 06:00pm. Por tuma contacto via di e siguiente number di telefon: 524 7433 (puntra pa e team di EFL november 2022). Tambe por manda un e-mail na LFS2021@cbs.aw pa cualkier pregunta of pa solicita pa un cita pa yena e cuestionario via telefon.

Nos ta gradici cada persona di antemano pa nan participacion na e EFL november 2022. Pa mas informacion di e EFL november 2022, por tuma contacto libremente cu e team di investigacion na CBS entrante 14 di november na number di telefon 524 7433 (puntra pa e team di EFL november 2022) of por manda un e-mail na: LFS2021@cbs.aw.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options