Casonan di hospitalisacion pa motibo di Influenza ta sigui subi

Data ricibi na Servicio di Malesanan Infeccioso y analisa pa seccion di Epidemiologia y Investigacion ta indica pa aña 2019, 34 persona a keda interna na hospital. Esaki ta mas cu 1 persona pa dia durante e ultimo 4 simannan.

Mundialmente tin un aumento den casonan di Influenza. Testnan di laboratorio ta confirma circulacion di e virus di Influenza tipo A y Influenza tipo B.

Na Aruba for di prome di januari te cu dia 26 di januari Departamento di Salud Publico su servicio di Malesanan Infeccioso a ricibi un total di 51 notificacion di infeccionan respiratorio di cual 70.4% tawata casonan positivo pa Influenza. Di e casonan notifica 34 persona a keda interna na hospital di cual 64.7% tawata personanan cu ta cay bou di e grupo di risico cu ta mucha bou 5 aña y e adulto mayor riba 60 aña.

E metodo mas efectivo pa preveni Influenza ta por medio di vacunacion, esaki especialmente pa esnan cu ta cay bou di e grupo di risico, tin un sistema inmunologico abou y tambe dunadornan di cuido. Banda di e vacuna di Influenza, otro medidanan di proteccion ta encera:

• Laba man frecuentemente cu awa y habon y seca esaki bon.
• Tapa boca ora di tosa of nister cu napkins of haci esaki den bo elleboog.
• No bishita lugarnan publico si bo ta sinti malo.
• Evita contacto directo cu hende malo.
• Evita di mishi cu bo wowo, nanishi y boca.

Ta hopi importante cu dunadornan di cuido y departamentonan di emergencia raporta casonan sospechoso di malesanan respiratorio infeccioso na Servicio di Malesanan Infeccioso, esaki pa por determina y premira un brote y di manera cu accionan por wordo tuma na tempo pa preveni esaki. 

Departamento di Salud Publico ta conseha dunadornan di cuido pa recomenda e vacuna di Influenza na e grupo di risico. Pa mas informacion tocante vacuna por tuma contacto cu servicio di Malesanan Infeccioso na 5224221 of dbz@despa.gov.aw.