Minister di Asunto di Adulto Mayor, Ursull Arends, a hiba un discurso na comienso di e conferencia unda a elabora riba maneho di gobierno cu ta dirigi riba tres punto di prioridad;
- gastonan pa un cuido di calidad;
- crea servicionan adapta y adecua cu e necesidad di e grupo
- cambio den perspectiva den comunidad pa cu embehecimento.
Oradornan di e CAAC II a presenta diferente dato, no solamente di ciencia y tur e beneficio di haci movecion pero tambe dato di Aruba su poblacion encuanto nos adultonan mayor y e retonan cu embehecemento ta trece cune pa nos Pais.
E mensahe primordial di e prome dia di e congreso ta cu comunidad mester move mas, mas ehercicio cu ta aporta na salud fisico y salud mental pero mas importante yuda contra enfermedadnan. Nunca ta laat pa cuminsa cu pasonan pa mehoracion di bo calidad di bida. Tur stap ta conta. Figurativo y literalmente mirando cu e minimo stapnan rekeri pa dia ta ~5.000 y 10.000 stap lo ta ideal. Forsa y resiliencia ta factornan importante cu movimento ta aporta na dje.
Nos mester cuminsa inculca e pensamento aki na jong pa asina e por bira un habito cu ta na beneficio di un miho calidad di bida ora yega na e edad di adulto mayor.
Den e simannan binidero lo tin diferente actividad y charlanan pa atende cu lo elabora riba topiconan cu ta relata na e cuido y bienestar di nos adultonan mayor.
Ministerio di Asuntonan di Adulto Mayor ta haci un yamada na e 60+ y tambe na famianan pa atende y participa na e actividadnan aki organisa pa promove embehecimento activo den comunidad.
Share this page