Campaña Nacional di Vacunacion contra COVID-19 - Segundo edicion di vacunathon

ORANJESTAD - Den Conferencia di prensa di Gobierno di Aruba diahuebs mainta, Prome Minister Evelyn Wever-Croes a haci un invitacion na pueblo di Aruba un biaha mas pa asisti na e segundo edicion di Vacunathon cu lo tuma luga e fin di siman aki na e 4 localidadnan unda e prome Vacunathon a organisa.

E campaña Nacional di Vacunacion contra COVID-19 lo tuma luga diasabra 22 y diadomingo 23 na Teresita Center na San Nicolas; Centro Libertador Betico Croes na Sta. Cruz; Club Don; Bosco na Noord y Ritz Carlton Hotel. For di 9’or di mainta te cu 4or di atardi (non-stop) tur esnan cu no a vacuna ainda y of mester haya nan di dos dosis di vacuna, por pasa libremente na e localidadnan menciona.

“E meta di Gobierno ta pa proteha cada ciudadano specialmente esnan mas vulnerabel. Mas y mas ta keda comproba cu una bes cu un persona ta vacuna e chens cu e ta haya e virus y cu por transmitie na un otro hende ta minimo y den caso cu haya e virus, e efectonan no ta serio”, Prome Minister a duna di conoce.

Vacunathon riba 22 y 23 mei 2021Unidad di vacunacion mobiel

Pareu cu vacunathon lo tin unidad mobiel den barionan pa yega na esnan cu ta interesa pa haya e vacuna. Hunto cu un trailer medico cu lo bay den barionan pa duna servicio mas cerca di ciudadanonan pa brinda e servicio di vacunacion.

Rekisitonan

Cada persona cu ta desea di vacuna mester tin nan carchi di AZV of nan Health App.

Pa esnan cu no ta documenta/ no ta inscribi na Censo pero tin mas di 6 luna ta biba na Aruba ta bin na remarca y mester presenta cu Paspoort pa prueba esey.

“Mi ta haci un apelacion na solidarismo nacional. Mas di 7000 ciudadano a acudi na e prome vacunathon pa ricibi nan prome vacuna y ta conta cu nan lo acudi e fin di siman aki tambe pa nan di dos vacuna. Kier inspira cada uno cu ta bay tuma nan vacuna e fin di siman aki, pa convence un amigo, colega of familiar pa bay cu bo y tuma su vacuna. Di e forma aki por tin mas hende cu ta vacuna”.

Covid-19 coronavirus vacuna  Situacionnan a demostra cu ora cu para hunto den retonan grandi di Pais Aruba, ta surpasa nan. Aworaki e reto ta pa yega na un grado di vacunacion mas halto. E Pandemia a costa bida di 105 persona na Aruba te na e momentonan aki. Ta keda den convivencia cu famia di tur esnan cu a perde un ser keri y pa no perde mas hende den e Pandemia aki, ban proteha esnan mas vulnerabel cu e vacuna aki.

Na e momentonan aki ta mira lus na final di e tunnel y cu vacuna ta mas cerca di esey tambe. 59% di nos poblacion a vacuna y ta mira e efectonan positivo entre otro: menos hende ta pega cu e virus, menos hende ta bira malo y bay den hospital, turismo ta den crecemento, economia ta habriendo, mas hende ta haya trabou y esaki ta locual cu kier logra, Premier Wever - Croes a splica.

Ademas, e porcentahe di recuperacion economico ta di 55%, cu bo sosten, aporte y participacion na vacunacion, lo por logra cu e porcentahe aki ta subi y Pais Aruba por yega mas cerca di normalidad.

Concluyendo Premier Wever - Croes a bisa: “E fin di siman aki lo tin mas o menos 150 personal riba pia, entre otro dokter y enfermero pa percura pa duna e miho servicio. Pa esnan cu tin duda si e vacuna Pfizer ta bon pa nan of no, lo tin dokter presente cu por duna splicacion y convence bo tal ves pa tuma e vacuna. Hunto den solidaridad lo logra vence e Pandemia aki y e efecto devastador cu e tabatin riba nos economia y nos Pais. Ta invita tur esnan cu falta e di dos vacuna y cu a acudi na e prome Vacunathon pa asisti na e di dos edicion di Vacunathon e fin di siman aki y hiba un hende acerca. Ban vacuna pa hunto por percura pa Aruba progresa!”

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options