Campaña 3C – Colecta, Conoce y Conserva a resulta exitoso y a yega su fin

Cu e campaña aki Archivo Nacional por a Colecta, Conoce y Conserva historia di nos Pais Aruba. Mester trece dilanti cu e portanan di Archivo Nacional ta keda habri pa tur esnan cu ta desea di trece informacion y material cu ta contribui na e memoria colectivo di nos Pais.

Minister di Cultura Xiomara Maduro tabata na Archivo Nacional y a ricibi un coleccion di fotografia for di Sr. Michael Arends, y for di Sr. Harold Frigerio a ricibi historia di 45 famia aki na Aruba.

E material ricibi lo keda warda na Archivo Nacional Aruba, y lo haci e preparacion necesario pa nan exhibicion. Asina nan lo ta accesibel pa un grupo mas grandi.

Esaki tabata e idea tras di Campaña 3C, pa trece informacion na archivo pa nan por cuida, prepara y expone esaki pa tur esnan interesa.

Minister di Cultura a gradici un y tur cu participa na e Campaña 3C, como tambe un danki na e staf y personal di Archivo Nacional Aruba pa un campaña exitoso. E campaña a inicia cu 3C, di Colecta, Conoce y Conserva y ta termina cu un C mas, e di 4 C ta di Concientisa.

Cu e campaña hiba, Aruba ta mas conciente di e responsabilidad di cada uno pa conserva y traha pa trece hunto na Archivo Nacional pa asina Aruba por tin e memoria colectivo di un Pais pa e generacion cu ta sigui nos.